Maot mensahe sa pari

Wala pa moabot ang adlaw sa pagpangampanya. Apan may mga pari ug madre nang nangombinser nga maoy pabotohan ang gipaluyohan nilang kandidato.

Okay ra unta kon ang gipili nilang presidential aspirant, mao poy gipitik sa matag kasingkasing sa kinabag-an. Pero dili man!

Angay bang ipamugos?

Suod ni misis nga pari, miteks. Pasuportahan kuno ang presidential aspirant nga nagustohan nilang kaparian.

Morag nahugno si misis. Mipahungaw: “Naunsa man si Father, Jav, uy? Puwerte man niyang nakasaway sa aspirant nga kaatbang sa ilang manok?”

Nahasubo ko’g apil. Unsaon, ang gi-promote ni Father, mao man ang kandidatong kusog moguba og maayong relasyon sa katawhan.

Ug mao hinuoy gikontra, ang aspirant nga gustong hiusahon ang tibuok nasud alang sa kaayohan sa tanan.

Dili ba miingon si Hesus sa Iyang mga tinun-an: “Ang nasud nga mag-unay dili makabarog.

Kon ang pamilya mag-iyaiya, kanang pamilyaha dili molungtad?” (Marcos 3:24-25).

“Apan sultihan tamo karon: Ang masuko sa igsuon, kinahanglang hukman.

Ang manginsulto sa igsuon angayng taralon sa konseho ug dad-on sa hukmanan.

Ang magpakaulaw sa igsuon ibalhog sa kalayo sa impiyerno.” (Mateo 5:22).

Mao kini ang langitnong mensaheng buot ipasunod sa atong Manunubos.

Apan si Fr. James ‘Dyames’ Uy-Gascon, pari sa Luzon ug supporter sab sa babayeng kandidato, may sukwahing mensahe nga gi-post sa social media. Matud niya:

“This coming election, itataya ko ang pagka-pari ko. Kung di kayo boboto sa matinong kandidato, wag na kayong magsimba.

Pa-lector-lector pa sa simbahan, pa-quote-quote pa ng bible, tapos, susuporta ng demonyo? Anong klase kayo? At handa na rin akong mawalan ng kaibigan kung ganyan din lang.”

Klaro kaayong dili gustog kahiusahan kining maong pari.

Nalimot, nga usa sa mga misyon nga gisangon sa Ginoo kaniya mao ang pagpanagat og mga tawo aron sila pundokon-sangyawan sa mga pulong sa Diyos.

Pero, unsa man ning gibuhat ni Father, uy? Giabog man hinuon niya ang katawhan palayo sa simbahan.

Nanghingalan pa’g demonyo sa iyang isig ka tawo. Ug nanginsulto’g lector, kinsa may katungod unsay pilion: ang maot mensahe sa pari, o ang maayong mensahe sa Ginoo sulod sa bibliya? Ang bulok bang pink, o pula?

Iyaha sa botante ang pagpili. Ug dili iya sa pari!