Hastang lana nikurog sa Omicron
Bisan inanay nang gipakalma sa industriya sa lana ang ilang kaalarma sa kinabag-ohan nga Omicron variant sa COVID-19 sa nangaging mga adlaw, wa mabawi ang pagtibugsok sa presyo sa niaging semana bale og 10%, ang kinadak-an sukad sa pagsugod sa pagsugod sa pandemiya.
Mao nga ang kinadak-an karong tuiga ang laslas sa presyo sa lana nga ipatuman sa gasoline stations sa Sugbo ug Pilipinas karong semanaha: Gibanabana nga hangtod sa P2.80 kada litro sa krudo; P2.70 kada litro sa gasolina; ug P2.80 kada litro sa kerosene.
* * *
Karong Martes sa buntag ipatuman ang kinadak-ang laslas, kon tumanon sa mga kompaniya sa lana ang naandang schedule nga ilang nauyonan uban sa Department of Energy (DOE) sa panahon pa sa Sugbuanong Energy Secretary Rene Almendras.
Mahimo sab nga mas sayo nga mapalit sa mga motorista ang mas barato nga lana kon paminawon sa oil companies ang awhag sa mga konsumidor ug transport groups: Nga human sa sunudsunod nga pagsulbong sa presyo niadtong Septiyembre ug Oktubre, angay lang nga laslasan na ang presyo karong buntag, karong hapon o ugma, Lunes.
* * *
Di hinuon ni maisip nga sayong pinaskohan. Kay pait ang sukaranan: Kalibotanong kahadlok nga mainat ang pandemya, nga mosulbong pagbalik ang mga kaso sa COVID-19 tungod sa Omicron nga mas mananakod kay sa Delta, nga mahasol na sang mga panginabuhi, ug nga moluhod pagbalik ang kalibotanong ekonomiya.
Taphaw ang tago nga pagsaulog sa mga motorista kay makaginhawa sa dakong sulbong sa presyo ug sa mga pasahero kay di mahinayon ang uminto sa plitehan. Kay ang gamayng alibyo mahimong pasiuna lang sa mas dakong katalagman.
* * *
Ang pasalig sa industriya sa lana nga ahat ang kaalarma sa Omicron tungod sa kakuwang sa mga ebidensiya nalasaw sa pasidaan sa mga siyentipiko nga ang pasiunang mga timaan nagpakita di lang nga mas mananakod kon dili mahimong makalupig ang Omicron sa mga bakuna.
May sukaranan hinuon sa paglaom nga ingon ana kabangis ang Omicron: Samtang posible nga iyang mapulihan ang Delta, nga maoy responsable sa 99% sa tinakdanay sa tibuok kalibotan, kasagaran sa mga bakunado nga natakdan nahiagom lang og mild symptoms, way mga komplikasyon ug nabalikan dayon sa kahimsog.
* * *
- Latest
