Insulto sa korte

Pagkapriso gikan sa unom hangtud sa napulo ka tuig maoy silot nga gipahamtang sa Sandiganbayan batok ni kanhi tourism secretary Ace Durano human gikonbikto sa kasong graft tungod sa giingong anomaloso niining kontrata pagpamalit og kalendaryo sa Department of Tourism niadtong siya pa ang nangulo niini.

Sigun sa anti-graft court, guilty si Durano sa kaso paglapas sa Republic Act 3019 o ang Anti-Graft and Corrupt Practices Act.

Mahimo pa hinuon nga iapelar ni Durano ang hukom.

Ang kaso nag-ugat sa pagsulod sa DOT og kontrata sa PDP Digital Inc. niadtong 2009 sa kantidad nga P2.7M nga wala moagi og public bidding.

Alang sa korte gihatagan sa DOT og pabor ang maong kompaniya. Apan si Durano dali nga mipakaminus sa nahimong hukom sa Sandiganbayan.

Gihulagway niya kini nga “politically motivated” sanglit kandidato man siya pagkagobernador atbang sa incumbent nga si Gobernador Gwen Garcia.

Gihimug-atan ni Durano nga way nahitabong overpricing sa maong kontrata.

Apan unsaon pagkasayod sa publiko nga way overpricing nga nahitabo nga wala man sila mohimo og public bidding?

Kun gipaagi pa ni Durano og subasta ang maong kontrata hayan dunay laing mga kompaniya ang motanyag og mas barato nga presyo alang sa “conceptualization” ug desenyo sa kalendaryo.

Sa inyong huna-huna dili ba mahal ra ang P2.7M nga kontrata alang sa paghimo lang og desenyo sa kalendaryo?

Wa pay labot ang actual nga printing sa mga kalendaryo niini.

Ang abogado ni Durano mipasabot nga way illegal sa transaksiyon bisan wala moagi og bidding tungod kay gitugot sa balaud ang alternatibong paagi sa procurement.

Tinuod dunay mga higayon nga itugot ang alternative procurement labi na panahon sa emergency diin dunay dakong kalamidad nga nahitabo ug wa gyuy laing supplier nga available.

Apan unsa may emergency sa pagpahimo og desenyo sa kalendaryo? Ang PDP Digital Inc. ra bay bugtong kompaniya dinhi sa Pilipinas nga makamao modesenyo og kalendaryo?

Kataw-anan pud ang paggamit ni Durano sa politika aron ipakaminus ang desisyon sa korte.

Atong hinumduman nga ang kaso nahitabo niadto pang 2009.

Dihang gipasaka sa Ombudsman ang kaso batok niya dili pa siya kandidato pagkagobernador ug tingali ang iyang kaatbang wala pa gani masayod unsay iyang mga plano sa politika sa umaabot.

Di sab makiaangayon alang sa Sandiganbayan ang paggamit ni Durano sa politika nga rason tungod kay sama ra nga iyang gipasanginlan ang korte nga nagpagamit sa kaatbang niya sa politika.

Insulto ug timailhan ni sa iyang kakuwang og respito sa systema sa hustisya ug balaud sa atong nasud.