EDITORYAL - Dakong pagbudhi

Human sa dakong mga kalamboan sa politika sa nakalabay nga mga semana, daghan gihapon ang nagtuo nga gibudhian sila ni Davao City Mayor Sara Duterte gumikan sa desisyon niini nga makig-tandem kang kanhi senador Bongbong Marcos alang sa piniliay sa sunod tuig.

Alang kanila, ang desisyon ni Sara nga modagan pagkabise presidente ilalum sa bandila ni Marcos usa ka “selfish act” ug pagluib gumikan kay iyang gipili ang anak sa kanhi diktador kansang pamunoan nahimong simbolo sa kurapsiyon sa nasud.

Daghan sa mga dumadapig ni Sara, ilabina ang mga Bisaya, miingon nga biktima lamang ang presidential daughter sa maniubra ni kanhi presidente Gloria-Macapagal Arroyo, kinsa giingong gusto na usab nga mag-speaker sa Ubos Balay Balauranan.

Hagbay rang gituohan sa tanan nga si Arroyo maoy nagpaluyo sa BBM-Sara tandem. Aduna bay dakong salapi nga nalambigit niini base sa mga tabi-tabi sa uban? Ambot, apan ato kanang hatagan og benefit of the doubt.

Hinuon dugay ra kitang nahibalo sa dako ug kusog nga popularidad ni Mayor Sara Duterte, kinsa nalambigit sa usa ka kontrobersiya sa dihang iyang nasuntokan ang usa ka court sheriff nga nagpatuman sa usa ka demolition order.

Samot nga misidlak ang iyang ngalan human sa 2016 national elections diin midaug ang iyang amahan, si Davao City Mayor Rodrigo Duterte, pagkapresidente. Sukad niadto, naanad na kita nga motawag kaniya og “Inday Sara.”

Tungod niini, daghan sa iyang mga kaalyado, ilabina kadto’ng mga Diehard Duterte Supporters (DDS), ang gusto nga modagan gayud siya pagka presidente sa 2022 elections. Kini aron magpadayon gayud ang mga programa ug proyekto sa iyang amahan.

Apan unsang pagkahitaboa nga nakigkita man siya ni Arroyo sa isla sa Balesin diin didto gipangusog ni Arroyo ang BBM-Sara tandem. Ang resulta: miduso gayud sa kandidatura pagkabise presidente si Sara.

Karon, daghan ang nag-alburoto nga mga Bisaya ug mga DDS kinsa mihulagway nga ang maong lakang usa ka dakong pagbugdhi.