Manamkon pa'y toro!

Ang PDP-Laban naglaraw nga mosagop og laing standard bearer sa 2022 elections human giatras ni Senador Bong Go ang iyang kandidatura pagka-presidente.  Unang higayon kini nga ang nagdominar unta nga politkanhong partido sa nasud walay standard bearer sa umaabot piniliay.  Dili ikatingala ang nahitabo kay dili desisyon sa partido ang paglansar ni Senador Bong Go, ug labaw nang wala konsultaha ang partido ning iyang pag-atras.  Nahisama na karon ang PDP-Laban sa babaye nga dili makabaton og anak.  Haum sa PDP ang pagya nga, “Manamkon pa’y toro”.  Hala no!

“Silot” sa di magpabakuna

Matud pa ni Labor Secretary Bello, ang ideyal nga kahimtang mao nga mabakunahan unta ang tanang trabahante.  Apan kay di man mapugos, pangayoan na lang ang empleyado og resulta sa PCR o antigen test aron makasulod sila sa trabahoan.  Dugang galastohan kini sa mga trabahante apan kon magpabakuna lang, makalikay sila sa maong palas-onon.  Ang kahimtang sa mga trabahante, makapahinumdum sa asoy sa usa ka boksidor nga lupig kaayo sa iyang kontra.  Matud pa niya, “lihay’s wala, piti; lihay’s tu-o, piti gihapon.  Ay, dumiretso pa ko’g ligeed, nakapahulay gyud”.  Pagkatoytoy!

Walay maskara

Matud pa ni Acting Presidential Spokesperson Karlo Nograles, ang mga malls ug ubang establisemento adunay diskresyon kon pasul-obon ba nila ang customer og face shield una kini pasudlon.  Ubos sa lagda sa kagamhanan, voluntary pa karon ang pagsul-ob sa face shield sa lugar nga gipaubos sa Alert Level 3.  Niini’ng paghatag og diskresyon sa mga establisemento, masayran nato kon unsa ang palabihon sa mga tag-iya: luwas nga panglawas ba o ganansiya.  Kon basehan ang tawhanon’g kinaiya, hayan ipatigbabaw ang ganansiya, labi pa kay kon ang kustomer ang pangutan-on, dayag nga mas pilion ang walay maskara.

Usapa ang report

Base sa gipahigayon sa Bloomberg nga COVID Resilience Ranking sa buwan sa Nobiyembre, ang Pilipinas nagpabilin nga labing laksot nga lugar nga puy-an atol sa pandemya.  Kini, bisan pa man sa pag-kunhod sa kaso sa COVID ug sa halapad nga pagpamakuna.  Wala pa molurang ang kagahob sa pag-ambahan sa kagamhanan sa giingong kalampusan sa unang adlaw sa “national vaccination program”, ania dayon kining tahô nga daw mabugnaw nga tubig nga gibûbô sa nag-alintabo’ng pagpangandak.  Ginaingon nga, “Ayaw ipha ang pisô kon wala pa mapusâ ang itlog”.  Apan ginaingon usab nga, “Wala’y lugar nga sama kaanindot sa kaugalingong panimalay”.  Busa, ngadto sa Bloomberg: “Usapa na’ng inyong report”. Hala no!

Naghimo’g fraternity

Mipasidaan ang World Health Organization nga taas ang risgo nga dala sa Omicron Variant sa COVID base sa mga sayo nga ebidensya ug nga adunay “severe consequences” niadtong matakdan niini.   Lain na usab kining matang sa daw walay katapusan nga hulga sa COVID.  Sa kadaghan sa letra sa alphabet, magdahum na lang kita nga aduna pa’y laing variant nga madiskobrehan.  Aduna nay Beta, Delta, Lambda ug karon Omicron variant na usab. Matud pa sa akong amigo, “Naghimo man tingale’g fraternity ang coronavirus.”  Pagkatuytoy!