Kinsay kurog sa Omicron
Kon ikumparar sa nahauna nga mga variant sa COVID-19, labihang paspasa sa pagsulbong sa mga kaso sa labing bag-ong variant nga Omicron, nga gikabalak-an nga mas mananakod ug mas makamatay kay sa iyang mga gisundan:
- Unang nadawat sa World Health Organization (WHO) ang kasayuran mahitungod sa bag-ong variant gikan sa South Africa niadtong Nobyembre 24, Miyerkules sa niaging semana.
- Ang labing unang kaso sa Omicron nasubay nga gikan sa Botswana sa sample nga nakolekta niadtong Nobyembre 9, kapin sa duha ka semana pa lang ang nilabay;
- Human lang sa pila ka adlaw nikatap dayon ang Omicron sa Belgium, Hong Kong ug Israel; ug
- Napilupilo dayon og ka-10 ang gidaghanon sa mga kaso sa Africa tungod sa Omicron.
* * *
Makatabang tingali kon atong ikumparar ang Omicron sa iyang gisundan nga Delta:
- Ang Delta nga unang nakit-an sa India sa Disyembre 2020 naabtan og pila ka buwan una nisulbong sa Britanya, Estados Unidos, India ug ubang kanasuran;
- Ang Delta dunay duha ka mutations samtang ang Omicron dunay 10 ka mutations (ang gidaghanon sa mutations makahatag sa kagaw og katakos paglikay sa mga bakuna nga gimugna para sa orihinal nga kagaw); ug
- Ang usa ka positibong kaso sa Delta nakatakod og hangtod walo samtang Omicron gikabalak-an nga makatakod og hangtod 10.
* * *
Bisan maabtan pa og pila ka semana ang mga pagtuon kon mas mananakod, mas makamatay ug mas makalusot ba sa mga bakuna, mas paspas nga nahimo og mga lakang ang kalibotan base sa pasiuna ug nihit pa kaayo nga kasayuran parte sa Omicron:
- Giila dayon siya sa World Health Organization (WHO) nga variant of concern, ang labing taas nga kategoriya sa kapeligro sa bag-ong mga bersiyon sa kagaw sa Covid-19;
- Ni-ban dayon sa flights gikan sa Africa ang nagkalainlain nga kanasuran, apil na ang wa kaayo mabantog sa kapaspas pagtubag sa kalamboan sa pandemya nga gobyerno sa Pilipinas;
- Nitidlom ang stock markets sa nagkalainlaing kanasuran tungod sa kabalaka nga mosamot kahinay ang pagtimbakuwas kon di man malup-og na sab pagbalik ang kalibotanong ekonomiya; ug
- Nitibugsok ang presyo sa lana og 10%, ang kinadak-an nga us-os sa usa lang ka adlaw sukad sa pagsugod sa pandemya.
* * *
- Latest
