EDITORYAL - Pandemiya ug eleksyon

Sobra katunga sa mga hamtong sa Pilipinas ang mihulagway nga ang tuig 2021 maoy kinalisoran sa panginabuhi kun itandi sa miaging tuig. Base kini sa survey nga gihimo sa Social Weather Stations gikan sa Septiyembre 12 hangtud 16.

Matud pa sa survey, 57 porsiyento sa 1,200 ka mga hamtong nga gipangutana sa SWS gikan sa Luzon, Metro Manila, Visayas ug Mindanao.

Samtang tuod og dili kini makonsiderar nga mao gyud ang tingog sa tanan, apan nakahatag kini og ideya kun unsay sitwasyon diha sa ubos.

Kay ang gobiyerno karon nakatutok lang sa mga numero sa gidaghanon sa mga nagkasakit og COVID-19, gidaghanon sa bakunang nangabot ug nabakunahan ug uban pa.

Kun dili pa sa pag-insister sa mga magpapatigayon, dili pa gyud tingali unta makapangabli ang daghang mga negosyo karon. Apan bisan pa niini, daghan pa gyud gihapon ang wala pa makabangon gikan sa krisis tungod kay wala pa nakabalik og trabaho.

Sa Nikkei’s COVID-19 Recovery Index sayo ning buwana, ang Pilipinas naa sa kinatumyan sa listahan sa nag-unang 120 ka mga nasud.

Target sa gobiyerno nga mabakunahan karong tuiga gikan 70 ngadto sa 90 porsiyento sa populasyon, apan base sa talaan sa Department of Health, 24 porsiyento o 26.18 milyones palang sa mga Pilipino ang kompleto na sa bakuna, samtang 28.05 porsiyento o 30.59 milyones sab ang nakadawat na og unang dose.

Siguradong duna na say kwartang maglihok aron mamalit og botos gikan sa nasudnon hangtud sa lokal nga piniliay. Kaning krisis karon parangan og vote buying, siguro gyung mahitabo.

Kay dili man kini mapugngan, gamiton lang gihapon unta sa mga botante ang konsensiya sa ilang pagpili dili tungod kay gipalit ilang boto, aron ang mosunod nga mga mapiliang lider sa gobiyerno dili mangurakot.