Kooperasyon kinahanglan pagbuntog sa pandemiya

Mipasidaan ang Department of Interior and Local Government (DILG), ilang pasakaan og kaso ang mga local government unit kun dili magamit ang mga bakuna batok sa COVID-19 ug maabtan sa expiration.

Si Secretary Eduardo Año miluwat niini atol sa “Talk to the People” ni Presidente Rodrigo Duterte niadtong Lunes sa gabii.

Nakasabot ko sa tumong sa DILG nga kinahanglang dasigon ang mga LGU paghingusog sa pamakuna tungod kay kini lang ang bugtong paagi aron kita makabalik na sa normal. Apan kinahanglan bang hulgaon og kaso ang mga LGU?

Dili mahimong direktang pugson sa mga mayor ang ilang mga residente pagpabakuna. Bisan og mag-awas ang supply sa bakuna ug way magpabakuna way mahimo ang mga mayor gawas sa paghangyo ug pagpakiluoy lang sa katawhan nga unta sila magpabakuna.

Kalapasan sa tawhanong katungod ang pagpugos ni bisan kinsa nga magpabakuna bisan supak sa iyang kabubut-on. Busa dili makiangayon kun ikiha sa DILG ang mga mayor kun dili magamit ang bakuna nga gihatag sa nasudnong gobyerno ngadto nila.

Sigun pa sa karaang panultihon, mahimo nimong guyoron ang kabaw paingon sa lim-aw, apan dili nimo kini mahimong pugson sa pag-inom sa tubig gikan sa maong lim-aw.

Apan bisan dili mahimong direktang pugson sa mga mayor ang ilang mga residente nga magpabakuna, wa say nagpugong sa mga mayor nga moluwat og mga lagda aron mapugos ang publiko sa pagpabakuna.

Ug ang bahad sa DILG mahimo nilang magamit aron mapugos ang katawhan sa pagpabakuna. Sa unsang paagi? Pananglit himuon sa mga LGU nga requirement ang vaccination card alang sa public transportation, pagpamalit sa merkado, pagsulod sa mga grocery stores, ug uban pa.

Kun dili na makasakay og public transport ug makapamalit sa merkado ug bisan makasulod sa mga mall ang way bakuna, tingali mapugos ang kadaghanan sa pag-adto sa mga vaccination center aron sa pagpabakuna batok sa COVID-19.

Panahon na nga ipatuman ni sa mga LGUs ang maong lagda tungod kay duna nay igong supply sa bakuna.

Gikinahanglan ang kooperasyon sa matag-usa aron atong mabuntog ang pandemya ug mabalik sa normal ang atong mga kinabuhi.