Padaghanay'g paon

Matud pa ni Bise Presidente Robredo kon hatagan ang botante og kwarta bugti sa iyang boto, angayan dawaton ang kwarta apan botohan gihapon kadtong kandidato nga ilang gisuportahan.  Dugang pa ni Robredo, samtang ilegal ang vote-buying apan malisod dakpon ang naghimo niini.  Daw pagdawat sa kamatuoran kining linya karon sa Bise Presidente.  Gisagop niya ang karaan’g pagya nga “tunla ang paon, iluwa ang taga.” Kon mao ni’ng kalakiha, padaghanay na lang diay sa “paon” ang mga  kandidato.  Kadtong walay “paon”, ayaw na lang patuga-tuga.  Saoonz!

Kuwidawo sa gipangayô

Kon si Senador Manny Pacquiao ang pabut-on, mas maayo nga face to face ang debate nga pagahimoon tali sa mga kandidato pagka-presidente karon’g 2022 Elections og dili pinaagi sa online.  Alang sa senador, mas maayo nga mag-atubangay aron masayran sa katawhan ang tinud-anay.  Ang debate dili makapalambo sa gihuptan’g kwalipikasyon ug katakos sa kandidato, hinonoa, mag-padayag usab kini sa iyang mga kakulangon.  Adunay panultihon nga “ayaw sutaa ang kalawom sa sapâ ginamit ang imong duha ka tiil”.  Angay pahimangno-an ang nanganti sa maong debate.  Careful!

Dili unta apostoles

Usa ka pari nga Katoliko hingpit na’ng gihukasan sa iyang klerikong katungdanan human miduso sa iyang kandidatura sa pagka-mayor sa usa ka lungsod sa Camarines Sur karon Eleksyon 2022. Nahisupak sa Canon Law 285 ang gibuhat sa maong pari diin gilatid nga ang mga kaparian gidid-an paghupot og mga publikong katungdanan.   Dili kuno maayo nga magkuyog sa usa ka sakyanan ang politika ug relihiyon kay kon mahitabo, pihô nga adunay alimpulos nga magsunod.  Gani, adunay panglantaw nga dili ganahan si Hesukristo og eleksyon, kay kon buot pa Siya, gipadalhan unta kita niya og mga politiko og dili mga apostoles.  Baya no!.

Sa ngalan sa kalamboan

Luyo sa mga pagsupak, mipadayag si Consolacion, Cebu Mayor Alegado nga ipadayon gayod ang reclamation project sa lungsod kay dili mahimong isakripisyo ang kaugmaon sa umaabot nga henerasyon tungod lang sa pagpreserbar sa interes sa pipila. Gipasabot sa mayor nga 70% sa topograpiya sa lungsod pulos bakilid, busa kinahanglan ang pag-expand paingon sa dagat alang sa dugang luna.  Ekonomikanhong kalamboan ang sagad nga rason sa mga lider pagduso sa ilang gilaraw nga mga proyekto.  Sama sa asin nga makapa-lami sa sud-an, ang konsepto sa ekonomikanhong kalamboan maoy maghatag hustisya ug kaanyag sa buhat pag-guba sa kadagatan ug pagpatag sa kabukiran.   Fezteleerrn!

Politikanho’ng hinabang

Tungod sa nahitabong pagbahâ sa lungsod sa Sogod, Cebu, diin mokabat sa 300 ka pamilya ang naapektohan, mibahâ usab ang hinabang gikan sa mga politiko nga sagad mga kandidato karong Eleksyon 2022. Ang takna sa pagpangandam milabay na sa panahon nga maigo na kita sa katalagman.  Busa aduna’y oportunidad ang mga politiko sa paghulip sa maong kakulangon pinaagi sa pagpadangat sa hinabang. Sagad magkahiusa ang katilingban kon adunay natural nga katalagman, apan magkatibulaag kini kon adunay politikanhong katalagman.  Hinabang is lyf!