Santa la Muerte

Kini ang nakahatag og igong pagtagad sa mga netizens diin nahimong sentro niini ang Parokya ni San Miguel Arkanghel sa Argao, Cebu. Daghan ang nipahimangno nga dili kini sabton nga santa ug busa dili kini makaampo alang sa atong panginahanglan. Ang Santa la Muerte gihubad man ingon nga Balaang Kamatayon. Pahinumdom kini alang sa matag usa kanato nga ang kinabuhi ning kalibotan limitado ra gyud kaayo. Mahimong ania pa kita karon apan ugma wala na. kitang tanan mangandam gyud alang niini.

Sa laing bahin, dunay laing mikomentaryo nga ang Santa La Muerte mao kuno ang patron sa mga gangsters sa Mexico. Sinister kaayo kun mao kini. Hinuon kun maghisgot kita og kinabuhi sa mga kriminal nahimong kabahin na gyud hinuon ang kamatayon. Pagpatay o dili ba kaha mapatay. Ang kamatayon nahimong routine lamang alang kanila sa makauna lang.

Mahimong kuyog niini ang aborsiyon nga maoy gihimo sa kadaghanan karon nga walay pagtamod sa kinabuhi. Himoong rason nga mas maayo pa ang mawala ang bata kaysa mag-antos kun ugaling pakatawhon pa. Kalakip pud niini ang tawo nga gitahasan sa pagpanalipod sa kahimsog natong mga yanong lungsoranon ang niunay man og pahimulos sa pandemiya alang sa ilang kaugalingong kalipay ug kaharuhay.

Mao nga dili ikalimod nga nahimong haguka ang healthcare system. Ug sa hinay hinay daw nasinati nato ang katilingbanong pagpinal. Hinay hinay nga nibiya ang ginhawa ug hinay hinay nga nalangkat ang kinabuhi sa kadaghanan. Kinit ungod kay mismo ang pag-ampo daw dili man makadulot sa bagang nawong sa mga tigpasiugda. Bisan tuod kun managsama kitang tanan nga makalabera, apan dili maayo nga diha sa atong kinabuhi kita mamintaha.

Ang Santa La Muerte nipahinumdom  kanato nga kun pangandoy man nato nga mamahimong balaanon ang atong kamatayon, unta mamahimong balaanon pud ang pagpakabuhi ning kalibutanon. Kay ang atong kamatayon misalamin man kun sa unsang paagiha nato gipuy-an ang atong kinabuhi.