EDITORYAL - Asang hustisya?

Pwerteng dakoa sa pagsaka sa presyo karon sa produktong petrolyo nga sulod sa walo ka semana nang nagsaka ug walay ubos-ubos ang presyo. Nakadugang kini karon sa kalisdanan sa katawhang nabun-og na sa krisis tungod aning pandemiya sa Covid-19.

Tungod sab sa pagsaka sa presyo, sunod sab nga misaka ang presyo sa mga batakang palaliton. Angkunon man o dili sa mga ahensiya sa gobiyerno, duna gyuy pagsaka sa presyo nga nasinati karon sa kamerkadohan.

Ang kuyaw ani karon, kun patas-an sab ang presyo sa mga pletihan, samot na gyud og kauyamot ang katawhan kun kini matugotan. Daan nang mahal ang pletihan karon tungod sa modernisasyon sa transport sector.

Sa nakalabay nga pito ka semana, miabot na og P7 ang sumatotal sa pagsaka sa presyo sa produktong petrolyo.

Dili kini kontrolado sa gobiyerno tungod kay base kini sa pinalitay matag baril sa lana sa world market.

Apan ang magbago mao ang mga sumasakay ug ang mga konsumidor tungod kay sama man og domino-effect kining pagsaka sa presyo sa produktong petrolyo.

Kun kini maoy momahal, mosaka sab ang presyo sa mga palaliton tungod kay nigamit man sab og petrolyo ang mga makinarya, pabrika ug transportasyon.

Ang nakapasubo niini, walay mabuhat ang gobiyerno batok sa mga petroleum distributors dinhi sa nasud aron pagkgangon ang sobra-sobrang pagbaligya niini.

Laing makapadismaya gyud sa publiko mao ang kadako sa deperensiya sa pagsaka itandi sa pagkunhod.

Nabantayan sab nga kun price increase gani ang hisgutan, dali kaayo silang makapasaka dayon sa presyo, apan kun price rollback na gani, maabtan pa og tagtulo ka adlaw ayha pa nila usbon ang presyo.

Makapahibulong nga kung patas-an ang presyo dali mang mahurot ilang pundong petrolyo mao nga bag-ong pinalit nga pundo na silang gibaligya nga mas mahal, apan kun paubsan gani ang presyo dugay kunong nahurot ang ilang unang napalit sa mas mahal nga presyo.

Mas daghan ang pagsaka ug mas dako ang usbaw sa presyo apan kun itandi sa gidaghanon sa pagus-os , pwerte rang layoa. Aning paagiha bilyon-bilyon ka pesos ang mabulsa sa mga oil companies ug gasoline stations.