EDITORYAL-Angay patambungon sa Senate hearing

Sa ngalan sa kaangayan ug kamatuoran, angay tingaling tahuron sab ni Pres. Duterte ang papel sa Senado bahin sa ilang gihimong hearings mahitungod sa matud pa mga deperensiya sa  paggamit sa kwarta sa katawhan pagatubang aning pandemiya.

Niadtong miaging semana pormal nga gimando ni Duterte sa tanang miyembro sa iyang gabinete nga dili patambungon o dili sanungon ang mga subpoena gikan sa Senado nga naghimo og imbestigasyon bahin sa Pharmally Pharmaceutical Corp.  Ang maong kompanya gialegar nga bag-ohay lang nahimugso ug iya sa mga konektado ug appointees sa administrasyon ug maoy nakakuha sa mga bilyon-bilyon nga mga transaksyon sa gobiyerno pagpamalit og mga galamiton alang sa kampanya batok sa Covid-19 pandemic.

Dunay 45 ka grupo sa mga health professionals ang nipagawas ug nipirma og pamahayag nga katungod sa mga Pilipino mahibaw-an ang kamatuoran.

Ang maong kompanya nga giingong namuhonan lang og pipila ka gatos ka libo maoy nakakuha og daghang deals sa gobiyerno nga giingong moabot na og P8 bilyones. Mismo si Health Secretary Duque III uyon nga kinahanglang tambungan sa mga cabinet officials kining nga hearings sa Senate Blue Ribbon Committee apan bisan siya dunay pagduhaduha tungod kay duna may bulohaton ang maong mga opisyal.

Mao sab kini ang rason nga gihatag ni Duterte kun nganong dili nila patambungon ang iyang mga gabinete sa hearings. Sumala pang Duterte nausik ra ang panahon sa iyang mga opisyales diha sa Senado samtang duna silay kinahanglang atimanon pagkombate sa pandemiya.

Sakto ba kini nga rason aron dili patambungon ang mga hingtungdang opisyal? Kay kung tan-awon, mura og giprotektahan ni Duterte ang maong mga opisyal gikan sa pagbali-bali og pangutana sa mga senador.

Apan ang kamatuoran gikinahanglan sa katawhang Pilipino, kay kwarta kini sa katawhan ug makatarunganon tingaling mahibaw-an kun giunda ang pundo ug kun nasunod ba ang proseso. Basta klaro ug matinud-anon lang ang tumong sa imbestigasyon sa Senado nganong dili man tambungan? Dili ba mas maayo gani nga dunay mga ingon niini aron nga magmatangon ang tanang opisyales sa gobiyerno bahin sa kurapsyon.