Gipalabing palusot kay sa pandemiya
Ang kakiwaw sa agresibong pagdupa ni Presidente Rodrigo Duterte sa mga transaksiyon sa Pharmally Pharmaceutical Corporation uban sa Procurement Service sa Department of Budget and Management (PS-DBM) maribalan lang sa kaluod sa mga detalye giunsa pagwaldas ang buhis sa katawhan nga anam-anam nga nitumaw sa imbestigasyon sa Senate Blue Ribbon Committee.
Gitabonan sa presidente ang tanang buslot pinaagi sa silhig nga pag-insister nga dinalian ang mga panginahanglan, nga siya ang nitugot sa tanang panglaktod ug nga mas importante ang pagluwas sa mga kinabuhi kay sa pagsubay sa mga lagda.
* * *
Sa kapin sa usa ka tuig ug tunga nga pandemya sa COVID-19 nabantang ang pagdumili sa presidente pagsubay ug pagkat-on sa mga detalye sa krisis. Gitugyan sa iyang mga sinaligan ang inadlawng pagduma. Gani, ang panagsa niyang panginlabot wa katabang, nipasamot hinuon sa kalibog, sa katawhan.
Ikumparar na palihug sa iyang pagsubay sa matag dis-og sa imbestigasyon sa Senado, paspas nga pagsumbalik sa mga senador nga makabisto og bag-ong anomaliya ug kugihang pagsagang sa mga pasangil batok sa iyang mga tinudlo sa PS-DBM ug pinalabing mga negosyante sa Pharmally.
* * *
Kay wa man malipat ang imbestigasyon bisan sa tanan niyang balikas ug panghudlat unsa man ang sunod nga himoon ni Presidente Duterte batok nilang Senador Dick Gordon, Senate Minority Leader Frank Drilon, Senador Kiko Pangilinan ug kaubanan?
Hulgaon ba sab niyang mga opisyal sa Pharmally, silang Krizle Mago ug Linconn Ong, nga nisaad pagtabang sa imbestigasyon? Pasanginlan ba nga durugista o ahente sa mga komunista ang trabahante sa Pharmally nga nitug-an ni Senador Risa Hontiveros sa mga binuang sa kompaniya?
* * *
Daghang salamat sa patuyang sa presidente, nabantang ang pagbitik sa binilyon ka pesos nga buhis sa kompaniyang way puhonan, way track record, way suplay pero abunda og koneksiyon sa Malakanyang ug papating nga pagpaginansiya, pag-usab sa expiry date ug pag-repack sa substandard nga mga produkto gikan sa suppliers nga napalihok pinaagi sa laway.
Sa pikas nga bahin, nahikawan sa ayuda ang minilyon ka pamilya, nameligro sa depektusong personal protective equipment ang healthcare workers ug frontliners ug nisamot ang katalagman bisan nakabangon nang ubang kanasuran nga, nakatag-an ka, wa mopalabi sa mga binuang sama sa Pharmally.
* * *
- Latest
