Maglaway sa tam-is nga boto

Sa Septembre 30 na ang deadline alang sa voter’s registration alang sa gustong mosalmot sa piniliay sa tuig 2022 kay kitang tanan ang angayan manginlabot sa bugnong lugaynon ilabi na nato nga mga botante.

Basin ang usa ka boto nimo, nako, nato maoy makahatag og kausaban nga gitinguha natong tanan. Mag unsa man kong magasige lang kita og bagutbot sa mga reklamo gumikan sa kasagmuyo sa mga namunoan kong dili kita magpakabana sa pagpili sa mga tawo nga mohatag og tinood nga serbisyo.

Maayo kong kana maoy rason apan basin baya ang tumong ug tuyo nganong magparehistro aron makakobra sa mga benepisyo nga gisaad sa mga politiko nga mopahimulos sa kahuyang sa mga tawo ilabi na kadtong naglisod nga mogunit nalang sa suhab sa kutsilyo bugti sa gamayng kantidad alang sa ilang boto.

Ang tanan magdepende ra gyud sa konsensiya kong aduna pa man kay sa tinuod pa pang naa nay mga politiko karon nga nagsugod sa pagpamolatika sa mga tawo aron makuha ang gusto niini.

Ok ra seguro kong consistent sila sa pagtan-aw sa panginahanglan sa mga tawo bahala na og klaro na kaayo nga nagpahumot lang sila nga kunohay makakabus kay makighugoyhugoy sa mga pobre, makigsalo sa pagkaon, magkinamot ug makig selfie ug uban pang mga bolatik ug kuhaan pa gani og hulagway.

Naay duha ka politiko nga mideklarar na mga molansad sa national position, ang usa naay hulagway nga gi-dextrose samtang nagtrabaho kuno sa iyang opisina, pagkalata kaayo nga estilo showbiz kaayo.

Ang usa nagkinamot nga nagkaon nga gikuhaan usab og hulagway dayon post sa social media, karon nalang nga nagdako man ni siya nga ang kinamot ang iyang lifestyle dihang wala pa siya nahimong bilyonaryo. Sa harianon niyang panimalay pagka mahalona sa ilang mga gamit nga de numero seguro ang ilang lihok sama sa mga adunahan. Hinuon angayan lang pud kay dugo ug singot man ang gipuhonan niya aron makuha ang kaharuhay sa kinabuhi.

Dili ta palayo kay naa pud daghan dinhi sa duol nga dugay nang misawom sa kalibotan sa mga kabus o kanang gitawag sa Iningles nga emersion bahala na og mabutang sa peligro nga mataptan sa COVID-19 basta makasikit sa mga pobre kay para nila sure na nga madughit nila ang tam-is nga boto.

Magdahum kita nga mag-mega sale sa ilang pakulo ang mga politiko, apan naa pa gihapon sa mga botante ang desisyon ug mahimo lang makahukom kong pahimuslan nato ang katungod sa pag botar busa parehistro!