Self-mastery

Septiyembre 26, 2021: Ikakawhaag unom nga Domingo sulod sa tuig

Mga Pagbasa: Nu, 11;25-29/Sal. 19/San. 5;1-6/Mk. 9;38-43,45,47-48

Kini ang kanunay natong madungog sa atong mga katigulangan labina kun maghisgot kita sa atong kaugalingong mga kahuyangan. Ang ebanghelyo karong Dominggoha nipahinumdom kanato nga angayan natong i-train ang atong lawasnong kahilig. Wala kini magpasabot nga Iliteral nato pagsabot ang pagputol sa atong kamot, paglugit sa atong mata ug uban pa. unsa naman kaha sa kun atong sala mao ang pagpamabaye? Unsa kahay putlon? Kamo na  lay sumpay.

Apan seryoso kitang moangkon nga ang tanan natong pagahimoon mag-agad raman gyud sa atong pagpili. Kun unsa ang atong gipili mao usab ang atong pagadawaton nga tugbang ug linugdangan. Mao nga mahinungdanon kaayo ang self mastery.

Nagpasabot kini nga:

Ang mga dalunggan gamiton nato sa pagpaminaw kun unsay makaayo nga balita ug impormasyon, dili ang bakak ug tsismis.

Ang mga mata atong gamiton sa pagsud-ong sa kaanindot sa kalibotan ug sa atong katilingban. Tinuod dili man gyud hingpit ang tanan, apan makahuloganon ug makatabang kun ang mga mata gamiton nato sa pagsud-ong sa palibot uban ang mga mata sa kalumo ug kaluoy. Ning paagiha mas makahimo ka og mas daghang kaayohan sa imong palibot ug sa imong isigkaingon.

Ang dila gamiton sa pagsulti og mga pulong nga makapahupay ingon man panalangin labina sa mga higayon nga kinahanglanon kaayo ang bisan unsang nindot nga madungog.

Ang atong mga kamot gamiton sa paghawid sa mga kaigsuonan nga nagkinahanglan dako uyamot sa atong pagbulig kana kun ugaling sila magpahawid pud.

Ang atong mga ilong gamiton nato sa pagsimhot sa kahumot sa birtud sa gugma, pagtuo, ug paglaum diha sa atong inadlaw adlaw nga pagkinabuhi.

Ang lawas ingon nga sagradong gasa gikan sa kahitas-an. Busa angayan lamang nga gamiton nato kini alang sa kahimayaan sa tinubdan nga mao ang Dios natong tanan.