EDITORYAL - Gamit ba gyud ang face shields?

Subling gimando ni Pres. Duterte nga dili na gikinahanglan ang pagsuot og faceshields sa gawas sa mga balay o mga edipisyo. Kining iyang kamandoan bahin aning faceshields ikaduha na kini niining tuiga.

Niadtong Septiyembre 22 sa gabii, subay sa rekomendasyon sa mga health experts, si Duterte miingon nga dili na kinahanglang magsuot og faceshields sa gawas sa panimalay.

Apan gikinahanglan gihapon kining suoton kun naa sa mga lugar nga gitawag og 3Cs, o closed, crowded and close-contact.

Kining mga dapita mao ang mga malls, mga department stores, mga opisina nga dunay daghang transaksyon, simbahan, ug uban pa.

Kining faceshields dugay ng gipagamit sa mga Pilipino sukad pa sa miaging tuig, apan hangtud karon daghan pa ang naglibog o dili motuo kun epektibo o dili batok sa pagkatap sa Covid-19.

Sa nanglabay nga mga bulan, nalibog ang mga tawo bahin ani kay niadtong Hunyo 21, 2021 ang Malacañang namahayag nga dili na kinahanglang magsuot og faceshields, apan nianang pagkagabii sa samang adlaw, si Duterte namahayag nga kinahanglan gyud magsuot niini ini og gawas sa balay.

Misamot pa gyud ang pagduda sa mga tawo bahin sa kamahinungdanon niini kontra Covid-19 tungod kay dunay kasikas sa Senado bahin aning mga importasyon og Covid-19 related medical supplies ug gituohang usa kini sa gidudahan nga napangwartahan kay gi-require man pagpasuot kanunay ini og gawas sa balay.

Ang World Health Organization (WHO) miingon nga dili mahulipan sa faceshields ang kaepektibo sa facemasks. Apan giklaro niini nga ang faceshields makadugang sa proteksyon sa tawo nga dili matugpahan og virus ang ilang nawong o mata.

Sa ato pa, dili sa ingon nga wala kini gamit. Dugang kining proteksyon sa tawo kun gusto gyud malikayan nga matakdan og Covid-19.

Depende na sa tawo kun magsuot niini bisan sa gawas sa balay total wala man say balaod nga nagdili kanila pagpasuot niini.

Kinahanglan lang gyud nga sundon sa mga tawo ang simple kaayong health protocols, magsuot og facemask, social distancing, ug batasanon ang mag- disinfect sa mga kamot matag karon ug unya ug labaw sa tanan ang magpabakuna.