Killer gondola

Nakalas ang kinabuhi sa duha ka mga trabahante sa gitrabahoan nila nga highrise building nga usa ka hotel and casino diha sa South Road Properties kon SRP sa dakbayan sa Sugbo human mabugto ang cable wire sa motorised gondola gikan sa ika19 nga andana.

Kinsa uroy mabuhi kong mahulog gikan sa ingon ana ka habugon nga building? ang usa nagsakay sa gundola samtang ang laing usa nahulogan nga didto sa ubos niadtong tungora.

Buntag pa niadtong Martes nahitabo kini, apan wala dayon tugoti nga makasulod ang mga personnel sa Cebu City Disaster Risk Reduction and Management Office nga unang miresponde dala ang ang ambulansya. Apil ang mga police investigators wala usab pasudla ug labaw na ang media nga kutob ra gyud sa gawas naghuwat sa mga kasayoran gikan sa sulod diin nahitabo ang aksidente.

Miadto usab ang mga opisyal sa Office of the Building Official alas una sa hapon ug gipahuwat sila og usa ka oras ayha gipasulod. Kong wala pa tawagi ni Architect Florante Catalan, pangulo sa OBO, ang opisyal sa gitukod nga building wala gyud sila makasulod.

Ngano kaha nga dili man makasayon sayon og sulod ang mga otoridad sa dapit nahitabo ang aksidente? Lisod ba alang sa management nga mokooperar dayon aron usab masayran ang nahitabo?

Dili sila dayon magpasulod kay gahuna huna pa unsaon sa pagpangatarongan, kong dili mangugat ug masuko ang mga otoridad dili gyud sila makasulod.

Bisan og pribado sila apan naglambigit na og kinabuhi sa tawo ang isyu busa gikinahanglan nga mo-submit sila dayo ug ipakita ang ilang transparensya nga usa lang ka ka aksidente ang nahitabo kay sa magpaugat pa.

Mipahigayon og pakisusi ang OBO sa nahitabo ilabi na sa proseso sa trabaho ug safety sa mga trabahante ug sa kinatibok-an ang kaluwas sa building.

Dinhi nakita ni Catalan sa iyang mga mata nga karaan na kuno ang gihimong gondola nga gibutangan nalang gani og dagkong pisi isip suporta sa puthaw nga kable ug gihulagway niyang delikado.

Labaw sa tanan nasayran nila nga gawas sa tawo, aduna pa kunoy karga nga mga construction materials ang gondola nga maoy nakaingon sa pagkabugto sa kable kay ang kapasidad niini kutob ra man sa duha ka tawo ug gibutangan pa og mga bug-at nga materyales.

Ang pagbutang o paggamit og gondola magkinahanglan matod pa ni Catalan og permit gikan sa ilang buhatan apan dili siya maka issue sa gundula nga gigamit sa building kay wala kini mohaum sa tumong sanglit ang gondola sa gawas gamiton alang sa pagtaod o paglimpyo sa mga bintana.

Apan  gimao mao nila ang paghimo og motorised gundula o improvised elevator kay sa elevator shaft man gibutang nga maisop kuno nga usa ka kalapasan matod sa OBO.

Apil gani sa nakitang kakuwangan ang kapakyas sa management sa pagbutang og mga warning sign sa sulod aron mapahinumduman ang mga trabahante sa angayan ug dili angayang buhaton aron malikay sa disgrasya.

Gipatuman ang temporary suspension sa OBO ang pagtrabaho sa building hangtod makasumiter og report ug makasumiter sa mga gikinahanglan nga dokumento aron maseguro nga makorehian ang mga sipyat nga nakaingon sa kamatayon sa mga kawani.

 Unta dili na masubli ang ingon niini nga panghitabo kay luoy intawon kaayo ang pamilya sa mga trabahante nga mawad-an og mahal sa kinabuhi.