Leave na sad

Sugod niadtong Septembre 20 hangtud sa Oktubre 7 gitugyan na sab ni Mayor Edgar Labella ang pagdumala sa dakbayan ngadto ni Bise Mayor Michael Rama.

Kini maoy ika-unom nga higayon sulod niining tuiga nga mi-leave si Labella. Way klarong rason nga gitug-an si Labella unsay hinungdan niining iyang leave apan kini nahitabo human giangkon sa iyang anak nga nakasinati ang mayor og stroke niadto pang buwan sa Agosto.

Nahimo na nga regular ang iyang leave matagkaron ug unya. Human sa iyang leave mopahibawo ang mayor nga mobalik na siya sa trabaho apan magpabilin siya nga work from home.

Di magpakita ang mayor sa iyang opisina sa City Hall ug bisan nalang sa media pinaagi sa teleconference nga sagad niyang buhaton kaniadto.

Sa mga higayon nga kuno nag work from home ang mayor way nasayod tinuod ba gyud siyang nagtrabaho o ang iyang mga sinaligan lang sa City Hall maoy nagpadagan sa syudad.

Unsa ba gyuy tinuod nga kahimtang sa mayor? Kun dili na haum si Labella nga mopadayon sa iyang pangatungdanan nganong di naman lang siya mo-resign ug itugyan sa mas takos nga moserbisyo?

Anaa pa ba sa hustong kahimtang sa panglawas ang mayor nga mohimo sa gikinahanglang desisyon alang sa dakbayan o dunay laing mga tawo nga mipatigbabaw ang personal interest nga maoy nagmaniobra ug mihimo sa desisyon alang kang Labella?

Nahadlok ba ning maong mga tawo nga mapapha sa pwesto og hingpit nga mohulip si Rama maong inay paluwaton sa katungdanan si Labella mas gipili nilang mo-leave lang kini sa katungdanan matagkaron ug unya?

Kun magpabiling acting lang si Rama limitado ang mahimo niyang buhaton. Way katungod ang usa ka acting mayor nga manaktak ug manawat og empleyado sa City Hall busa protektado ang mga hinanib ni Labella.

Hinaut nakasabot sila nga niining panahon sa pandemya mas gikinahanglan ang aktibong pagdumala sa mayor.

Ug dili na ni mahimo ni Labella tungod sa iyang kahimtang sa panglawas.

Mas mahimo ni Rama ang maong gimbuhaton busa mas makaayo alang sa dakbayan ug ni Labella mismo aron makapahuway nga moluwat sa katingdanan ug itugyan sa hingpit ang pagdumala sa dakbayan niining nahabilin nga mga buwan sa iyang termino ngadto sa iyang bise mayor.