Siquijor kinapaspasang namakuna
Nakugang ko kinabag-ohang mga numero sa Department of Health (DOH) sa Central Visayas sa gidaghanon sa mga nabakunahan batok sa COVID-19 sa upat ka probinsiya sa rehiyon. Kay ang nag-una sa pagpamakuna mao ang kinagamyan ug kinapobrehan nga probinsiya, ang isla sa Siquijor, kansang kahimanan ug katakos sa pagpamakuna wa ra sa kumingking sa mas dagko niyang mga silingan.
Hangtod niadtong Septiyembre 19, Dominggo, 61% na sa target population sa Siquijor ang fully vaccinated. Ikaduhang labing daghan og nabakunahan, 24% sa target population, mao ang Bohol; ikatulo rang Sugbo, 19%; ug ikaupat ang Negros Oriental, 16%.
* * *
Unsa may nahitabo sa Sugbo, ang kinadatoan nga probinsiya sa tibuok nasud? Nganong sa ikapitong buwan na sa pagpamakuna wa pa man kaabot og 20% sa iyang target population ang fully vaccinated batok sa COVID-19?
Tungod ba kay mas agresibo nga giduso sa Kapitolyo sa Sugbo ang tuob ug air purifiers kay sa dinaliang panginahanglan sa mga bakuna? Tungod ba kay ang liderato sa probinsiya, imbes mopasabot sa kamapuslanon sa pagpabakuna, nigahin og mas dakong panahon sa pagpasabot sa mga katungod sa mga di magpabakuna?
* * *
Napamatud-an sab sa pagpamakuna sa Metro Cebu nga ang kadaghan og kahimanan sa syudad di garantiya nga mas paspas nga mahatagan og proteksiyon ang mga molupyo. Ang Cebu City, nga maoy kinadatoan sa Metro Cebu, ikalima ra sa kadaghan sa mga nabakunahan sa iyang target population:
Nag-una ang Mandaue City, 50%; ikaduha ang Lapu-Lapu City, 40%; ikatulo ang Naga City, 38%; ikaupat ang Minglanilla, 37%; ikalima ang Cebu City, 36%; ikaunom ang Consolacion, 35%; ikapito ang Talisay City, 32%; ug ikawalo ang Cordova, 12%.
* * *
Klarong naapektahan ang Cebu City sa misteryosong sakit ni Mayor Edgar Labella nga nakapugos niya pahuway sa iyang pinuy-anan. Wa katabang ang matag karon ug unya nga pagpuli ni Acting Mayor Mike Rama nga mas daghan og press conference kay sa aktuwal nga mga lakang paghingusog sa pagpamakuna.
Sama sa kaso ni Rama, di makatabang ang kasabaan sa mayor sa kapaspas sa pamakuna. Si Lapulapu City Mayor Ahong Chan mao ray makalupig sa kapagarpar ni Rama pero naunhan sa hilomon nga si Mandaue City Mayor Jonas Cortes.
* * *
- Latest
