Nagkahanap nga anino sa martial law

Kagahapong adlawa gihandom ang usa sa madulom nga panghitabo sa kasaysayan sa nasud, ang pagdeklara sa martial law. Unsa man ang atong mahinumduman niining panahona?

Kadtong mga tawo nga nakaabot ug naka-experience sa kinabuhi sa panahon nga gipaubos ang nasud sa balaod militar, apan alang niadtong wala na makaabot dili na gyud sila maka-relate ilabi na nga mga kasayoran makuha nalang nila sa social media.

Wala naman usab kaayo kini mapalawman sa mga subject sa eskwelahan. Sa laktod nga pagkasulti, ang mga bag-ong tubo wala nay pakialam sa panghitabo atol niining panahona.

Gani kining mga bag-ong henerasyon nabali man ang ilang pagtan-aw sa mga Marcos, sa tinuod lang basaha na ang mga komento sa social media di halos pro-marcos ang ilang ipadayag.

Lahi ra gyud itandi sa mga tawo kaniadto nga miinit ang kasuko sa mga tawo sa sistema nga gipatuman sa kanhi pangulo sa nasod Ferdinand Edralin Marcos. Kong unsa ka kainit ang naasoy’ng pagbati kaniadto inanay na kining napawong ug nabugnaw na.

Sa tinuod lang bi, sukad napalagpot si Marcos sa katungdanan ug nawagtang ang balaod militar, unsa man ang kausaban nga nakab-ot nato? Milambo ba ang panginabuhi sa mga tawo?

Aduna bay daghang mga programa ug proyekto ang mga presidente nga misunod kaniya?

Ang inyong tubag mao ra usab ang akong obserbasyon.

Dili ko makabasol sa uban nga moingon nga mas maayo pa man kaniadto sa panahon ni Marcos kay daghan man nga mga proyekto ang nahimo nga makita gyud sa atong mga mata nga hangtod karon anaa ug napahimuslan pa sama sa mga imprastraktura.

Ang akong maguwang biktima sa kabangis sa kamot sa martial law sa Mindanao nga gidakop samtang nanigway lang og kabaw kay sakop kuno sa mga walhon.

Napriso siya ug duha ka tuig, maayo nalang napamatod-an nga walay sala og nabuhian pero grabe pud ang damage nga naangkon sa iyang lawas kay gikulata og maayo nga gipakawot na gani og yuta aron siya ilubong. Maayo nalang kay nasundan og usa ka Italyanong pari og nagkuha og hulagway maong wala dayona sa pagpatay.

Tinuod bangis ang balaod militar kaniadto nga naabusohan sa mga anaa sa gahum.

Kaniadto usa lang ang nangurakot, apan karon halos ang gawas nga gisaligan ug naghupot sa pwesto sa mga ahensiya naduhig sa mga kaugalingong anomaliya.

Taas na nga panahon nga naangkon ang kagawasan nga gikwestyon sa uban nga kagawasan sa unsa man? Sa frustration seguro sa uban nga nag-ilis-ilis na og presidente apan wala man gihapoy kausaban.