Makaayo ba ang P100 milyones libel suit?

Natay-og tibuok Pilipinas pagbuto sa balita nga pormal nang mipasaka si Senador Manny Pacquiao og P100 million cyberlibel suit batok ni Pastor Apollo C. Quiboloy didto sa korte sa Makati City gumikan sa P3.5 billion Sport Complex Sarangani Project nga nahimong kontrobersiyal nga isyu.

Isyu nga maoy gipanag-istoryahan sa tabiang social media halos tanang adlaw. Isyu nga maoy gihimong sud-an sa pamahaw, paniudto ug panihapon sa nagpakabanang sosyedad, kinsa bisag layo pa ang national election, naniid na kinsay angay ibutang sa kinatas-ang puwesto sa Malakanyang?

Ug isyu nga wala ikahimuot ni Senador Pacquiao. Kay ‘fake news’ kuno nga gipakatap ni Pastor Quiboloy sa social media, diin nakagusbat sa iyang kaligdong.

Apan hagbay ra bayang mipasabot si Quiboloy sa publiko. Nga, wala siya mamasangil ni Pacquiao nga kini nangawkaw.

Kondili, nangutana lang siya kon hain na mopaingon ang P3.5B budget alang sa Sport Complex Sarangani Project, diin si Manny mismo maoy nangamahan sa maong proyekto?

Gani, napublikar man ang maong naaprobahang proyekto sa MindaNews, pinetsahag Marso 5, 2019 nga sinulat ni Bong S. Sarmiento.

Apan subo paminawon, nga ang usa ka senador, kinsa nailhan na sa tibuok kalibotan nga buotan, ligdong, manggihatagon, diyosnon ug labaw sa tanan, grabe ka mapaubsanon, sa daklit, nausab ang kinaiya tungod lamang sa politika.

Lalim bay, si Pastor Quiboloy nga gimahal sa iyang milyonmilyong sumusunod, kinsa misugyot pa nga mahimo ra nilang husayon ang maong panagbangi pinaagi sa debate o ubang pamaagi ibabaw sa usa ka tasang kape, iya hinuong gipasakaag P100M cyberlibel suit?

Hinuon, ayagon pa sa piskaliya ang mao niyang reklamo ug ang tubag-saysay sa gikiha (defendant) aron masuta kon may probable cause ba ang unod niini, ayha pa masang-at ngadto sa ubos nga hukmanan. Kon walay makita, aw, case dismissed!

Pero bisag ma-dismissed pa, ang pangutana mao: Makaayo kaha sa political career ni Manny ang iyang P100M cyberlibel suit nga nagplano ra ba siyang molansar pagka presidente sa Pilipinas? Mahibalik pa kaha ang kanhi dalaygon niyang imahe sulod sa kasingkasing sa katawhan human kini unaya niya sa paggun-ob?

Ang unsay umaabot linugdangan ning iyang gihimo mao ray makatubag niining tanan. Atong paaboton!