Dakung garbo unya sa Sugbo: modernized Carbon Market

Kinsa goy magdahom nga tapus sa kapin usa ka gatus ka tuig nga existence sa merkado sa Carbon, ma-modernized kini karong mga panahona. Bisan tingali sa nangaging city administrations, walay usa kanila ang mi-attempt bisan sa pagdamgo lang.

Lalim pag-modernize sa Carbon Market, ang hulagway unya niini mahisama na sa mga mall ug mga dagkung department stores. Kalisud ini!

Ako na kining gisugilon dinhi, isugilon ko kini pag-usab karon, kay aduna kiniy kalabotan sa pag-modernize sa Carbon Market.

Usa ka suod kong higala, dugay’ng nawala dinhi sa Sugbo, mihalin ngadto gawas sa nasud nanimpalad intawon.

Actually, usa man siya ka professional, adunay trabaho nga naghuwat kaniya.

Tapus sa kapin 25 ka tuig, nahibalik siya dinhi sa Sugbo. Daku ang iyang katingala tungod daghan  na siya’g nakita nga wala pa sa iyang pagbiya sa Sugbo. Mga malls ug mga dagkung department stores, mga restaurants, mga hotel ug mga beach resorts, ang ikaduhang taytayan nga nagkutay sa isla sa Mactan ug mainland Cebu, mga tag-as nga building ug mga skywalk, ug daghan pa. Impressed kaayo siya sa progress sa dakbayan sa Sugbo.

Apan sa iyang pag-suroy sa Carbon Market ug sa Taboan, iyang nakita nga mao lang gihapon ang kahimtang ug hulagway sa bata pa siya. Ug nakaingon siya sa iyang kauglingon nga daku pa’g kulang ang kaugmaran sa Sugbo.

Niuli siya balik sa ilang Amerika, kay usa na man siya ka American citizen. Kon mahibalik siya dinhi a year or two, mosiga gyud ang iyang mga mata ug ilong inig ka kita niya sa modernized  Carbon Market. Ang Taboan, ambot kinsa nga mayor unya ang makapa-modernize niini.

Mao nga ako, sige gyud ko’g ampo nga madayon gayud kining maong proyekto. Ang question lang kay it seems adunay pipila kanato nga dili buot nga ang credit unya adto paingon ni Mayor Ed Labella.

Anyway, sugdan na man gayud kini, ug na-isyo dayon ang pag-demolish sa mga stalls sa manindahay. Hinuon, matud ni Mlbn (Atty.) Rey Gealon, ang city legal officer, sumala sa napatik sa The Freeman,“the clearing of structures in Units 2 and 3 of the Carbon Public Market was a ‘valid exercise of the rights and power of ownership and administration’ by the city.”

Ug ang demolition sa mga stalls, gipaagi man sa due process. “The demolition was to pave the way for the renovation of the Carbon Public Market pursuant to the joint venture project of the city to modernize the public market, dugang ni Gealon.

Giingon dinhi nga ang mga stall owners gipahibawo nang daan, una pa ang actual nga demolition, diin ang mga nanindahay sa units 2 ug 3 gipahibawo, duha ka bulan before sa actual clearing operations.

Gani kadaghanan sa mga stall holders mi-boluntaryo pagguba sa ilang mga structures, ug mibalhin ngadto sa temporaryo nga katindahan.

“Stall certificates have been awarded to existing official stallholders at the Carbon Market including a substantial number of vendors classified as non-stall holders or ambulant/sidewalk vendors since the Carbon Market Redevelopment Project will increase the capacity of the public market from 1,200 stalls to 3,400 stalls,” dugang ni Gealon.