Way makasanta sa adlaw sa panudya
Kon ang pormal nga imbestigasyon sa International Criminal Court (ICC) sa mga pasangil sa bangis nga krimen batok niya mapakyas pagkumbinser ni Presidente Duterte nga bisan sa iyang gahom ug popularidad mahimong kapaninglan sa pagluba sa inosenteng mga kinabuhi ug pagyatak sa tawhanong mga katungod, napakyas siya sa pagkat-on sa kasaysayan.
Iyang idolo nga diktador, si anhing Ferdinand Marcos, mas hingpit ang pagkontrolar sa gobiyerno, nakahimo sa tanang bangis nga krimen—gikan sa pagpamatay ngadto sa pagpangawat sa nasudnong panudlanan—nga way korte ni Kongreso nga nibaraw niya, pero napukan ug napalayas sa Malakanyang.
* * *
Mahimong maglisod ang mga imbestigador ug prosecutors sa ICC sa paghipos sa tanang ebidensiya, pakigsulti sa tanang tagtungod sa mga nangamatay, sa tanang saksi sa extrajudicial killings ug pagsukitsukit sa tanang opisyal sa gobiyerno nga nagduma sa kampanya batok sa ilegal nga drugas, pero ang resulta sa pasiuna nilang imbestigasyon nimatuod nga di sila kababagan.
Mahimong di madakpan si Presidente Duterte ug ang iyang mga sinugo kon may arrest warrants na nga luwatan batok nila, kay kinsa man ang mangahas sa pagdakop sa labing taas nga opisyal sa republika, pero ang gidangatan ni Marcos nagmatuod nga may kinutoban ang tanan.
* * *
Mahimong modaog gihapon si Presidente Duterte sa bisan unsang katungdanan nga iyang daganan sa piniliay sunod tuig, mahimong mangharos ang iyang mga ituboy sa pagka presidente, senador, kongresista, gobernador ug mayor, pero ang kadominante sa Kilusang Bagong Lipunan (KBL) ni Marcos wa kapanalipod niya.
Mahimong magpabilin ang iyang popularidad—ambot tungod ba sa padayong kahadlok o pagkadani sa katawhan sa iyang estilo nga lahi sa naandang mga lider nga pinahimutang ang lihok ug sinultihan—pero bisan ang katalaw ug ka-ilarunon di forever.
* * *
Mahimong ang mosunod nga nasudnong pamunoan way kalainan kay iya gihapong magawongan, mahimong magpadayon ang way kinutobang pinatyanay ug pagpanggukod sa iyang mga kaatbang ug kinawatay sa iyang mga alyado, pero ang pagpahimus sa gahom di hangtod sa hangtod.
Mahimong nagkadugo ug nagkagidlay, mahimong nag-unay ug nagkatibuwaag, mahimong nagpatara sa mga pagpanamastamas ug nilingiw sa mga inhustisya, pero ang katarung ug kaligdong sa kinabag-an sa katawhan, sama sa banagbanag nga mopuli sa kangitngit, maoy mopatigbabaw batok sa mga puwersa kadaotan.
* * *
- Latest
