Abortion sa mga kuting sa Iring

Nabantayan karon ang pagdaghan sa mga iring ug bisan sa mga iro nga naglatagaw sa kadalanan ilabi na niining panahon sa pandemic diin ang mga tag-iya posibleng nakasinati og kalisod ug mibalhin sa ubang dapit ug gibilin ang ilang mga binuhing iring ug iro.

Usa kini sa nakakuha og pagtagad sa Department of Veterinary Medicine and Fisheries kon DVMF ug gipangitaan niya og pamaagi nga makontrolar ang paglipang o pagdaghan sa mga stray dogs ug stray cats.

Ang naandan nga gipanghimo nila ang pagpang-impound sa mga hayop nga naglagaw sa mga dapit nga peligro nga makapaak. Ug aron maseguro nga dili na manganak, gipangkapon nila ang mga lalaking iro ug iring samtang gipanglaygit(ligit) ang mga babayeng iring ug iro.

Mao usab kini ang gipanghimo sa ubang mga LGU sama sa Talisay, Mandaue ug Lapu-Lapu Citiy. Apan medyo nakurat ko sa gi-practice sa dakbayan sa Sugbo kay ang mga buntis o mabdos nga mga iring, ipaubos man sa abortion ang mga kuting nga naa pa sa tiyan sa iring.

Gani nasaksihan gyud nako ang procedure sa pagtangtang sa mga kuting gikan sa tiyan sa ilang inahan, inig ka human sa proseso isunod dayon ang ligation.

Unang gipakatulog ang iring pinaagi sa pag injection og general anaesthesia aron dili masakitan og sayon ra alang sa surgeon ang paghimo sa proseso, pagkahuman ipahiluna ang iring, hatagan og tambal hangtod maka reocover.

Gipasabot ni Dr. Jessica Maribojoc, ang incharge sa DVMF nga ang pamaagi nga ilang gisagop mao ang humane o makatao nga pagtratar sa mga hayop kay sayo pa lang mapugngan na ang pagdaghan sa mga iring ug iro.

Gawas sa mga latagaw nga hayop, aduna gyuy mga tag-iya nga sila mismo ang gusto ipa-abort ang koting kay mahasol na sila kon modaghan pa kini ug wala na usab silay ikabuhi.

Gani mismo sa DVMF adunay option nga ipaubos sa euthanisia ang mga iro ug iring ilabi na kadtong dili na matabang nga mamaak na gyud. Kong itandi ang euthanisia ug ang abortion murag pareho ra man seguro.

Ang ligation murag makonsider nga "humane" nga pamaagi sa pagkontrol sa population sa mga iring, apan murag sobra ra man ang abortion, hinoon wala man kunoy balaod nga nagbawal sa proseso busa mao kini ang ilang gigamit.