Makatubig na gyud ta

Unahon nato ang balita nga makapalipay sa mga tawo nga dugay na kaayong nabuktot sa paghinakot og tubig kay wa sila’y koneksyon sa Metro Cebu Water District (MCWD) sa ilang panimalay.

Nagplano ang kadagkoan sa MCWD pinaagi ni Chairman Joey Daluz III nga basin karong hinapos niining tuiga, mosugod na sila pagdawat og aplikasyon niadtong gustong pagpataod og koneksyon sa tubig sa kabukiran.

Ang tubig nga kuhaon gikan sa Lusaran Dam ug dad-on diha sa Barangay Busay, mag-agi sa laing walo ka barangay mao nga kadtong maagian sa dagko kaayong mga tubo sa tubig, aplay na mo!

Kini sama sa mga lumolupyo sa Pulangbato, Talamban, Pit-os, Cambinocot, Busay, ug uban pa, makatubig na kamo gikan sa MCWD.

Nalipay ko niining maong proyekto kay ako usa sa makabenepisyo. Duna man tuod ko’y linya sa tubig pero kapin sa tuig na nga wa gyud moagas.

Nakatubig lang tawon mi kay buotan kaayo ang mga amigo nako sa MCWD nga pirmi kaming hatdan og tubig pinaagi sa ilang water tanker.

Matud ni Chairman Daluz nga mga 20,000 ka pamilya ang makapahimulos niining water project nila gikan sa Lusaran Dam, kay matag adlaw ang Dam makasuplay man og labing minus 20,000 cubic meters nga tubig.

Giwenta kini nga ang usa ka balay mokonsumo og lima ka baril nga tubig kada adlaw.

* * *

Abi ninyo, karon lang sa administrasyon ni Chairman Daluz nga kanunay’ng gihatdan og tubig ang mga nagpuyo sa kabukiran.

Kadtong gipulihan nila nga administrasyon, sus paita, nabalian ko’g mulyi sa akong sakyanan sa pagsige’g hakot og tubig nga magkarga ko’g tag duha ka baril.

Mao nga naguol ko kay nakadungog ra ba ko nga si Chairman Daluz mora’g gihugon-hugonan nga padaganon sa pagka mayor kana kon si Davao City Mayor Sara Duterte modagan pagka presidente sa eleksyon sunod tuig.

Kon mahinayon nga si Chairman Daluz molansar pagka mayor, gitan-aw nako kon kinsa kaha ang sunod nga itudlo nga chairman?

Pero may nakatug-an nako nga kon mahinayon nga modagan pagka mayor si Chairman Daluz, ang ipuli kaniya usa gihapon ka tawo nga sinsero sa katungdanan.

Gani, matag adto namo sa bukid nga magsusi sa mga tinubdan sa tubig nga kakuhaan og suplay sa MCWD, kining maong tawo anaa gyud sa grupo.

Gusto gyud nako nga ang mga tawo nga molingkod isip chairman sa MCWD Board, mao kadtong dunay kaluoy sa mga way tubig, dili sama niadtong tawo nga nagbuwa lang ang baba sa pagsige’g tabi, apan ang katawhan nag-antos sa kanihit sa tubig.