Dili mosugot

Dear Tito Miguel,

Ako si Hernan, taga Cebu City, ulitawo. Naa koy naibgan nga babaye, sige siya og pangayo nako og kwarta unya mohatag ra sad ko kay naibog sad ko niya. Dihang nanguyab ko niya dili siya mosugot nako kay naa na kuno siya'y uyab. Naguol kaayo ko.Nakagusto ko niya intawon. Tambagi ko,  Tito Miguel.  —Hernan

Hernan,

Klaro kaayo, kuwarta ra iyang gusto ug giapas nimo. Di na unta ka mistil magpatambag pa. Apan kay naibog man ka, magpakabuta bungol na lang ka. Mao nay problema, ang pamasin nga kanimo naa siya’y pagbati nga gipahipi. Lagmit nakamatngon siya naibog ka niya, busa gipahimuslan ka, samtang nanguyab siya’g lain. Klaro kaayo, gigamit lang ka niya, lahi iyang gusto. Dili ikaw. Apan lagi kay naibog man ka, malipay ra sad ka nga gamiton, ang importante ikaw iyang duolon. Tinuod, ang paglikay ug pagbalibad kaniya sa pulong sayon ra, apan sa buhat pwerteng lisora. Kay usahay motuo kita sa gusto nato mahibaw-an o matagamtam. Pantasya kini, dili kamatuoran. Pili lang.

Aron ka makamata, suwayi’g balibad, kun mangayo usab. Tan-awa’g kanimo motagad pa ba. Lagmit kaniya ngil-ad na ka, malimtan ang tanan nimong gihatag kaniadto, tungod lamang kay nibalibad ka kausa. Kun wa na kay gamit, kanimo di na siya mopilit. Timan-i, ang hingpit nga makapalipay ug makapatagbaw sa tawo, dili mapalit sa salapi, labi na ang gugma. Ayaw pamalit og pagbati, maski gibaligya pa sa imo nga barato o tagi-tagi, sama sa gibuhat niya kanimo. Gihimo ka nga pitaka, busa kaniya ayaw pataka. Tito Miguel

Magpatambag ka? Ipada kang Tito Miguel: 0998-581-5856