Padag-ig suwat, buyboya!

Dear Tito Miguel ,

Ako diay si Hazel, taga San Remigio, Cebu . Bag-o lang mi gabuwag sa akong boyfriend nga si Paul tungod kay nag-char char sila sa usa sa akong barkada nga si Avrila.  Naglisod ko og move-on sa ilang gibuhat, unsa man akong buhaton Tito Miguel, aron hingpit nako nga mahuwasan sa akong kalagot nila? Salamat kaayo. —Hazel

Hazel,

Dunay proseso ang paglimot sa pagbudhi kanimo. Duna kay agian nga lima ka lain-laing emosyon. Magsugod kini sa paglimod sa kamatuoran, sundan kini sa kasuko. Apan usahay mailisan sa pangamuyo diin magpaubos ka’g magpakatanga. Unya’g balibaran ka’g itukmod palayo, mosinati ka’g depresyon sa di pa ka hingpit nga makadawat ug malimot sa tanan. Ang lumalabay nga panahon ang makaayo nimo puhon.

Kasagaran mao ni ang agian padulong sa kagawasan, pero dili tanan. Posible wala ka mosubay sa ang-ang, deretso ka sa kalagot, karon gusto na ka makalimot. Lagmit naglungot- lungot ka kay wa nimo sila manawong sa hait nga pulong. Pero di na nimo sila mistil atubangon.

Kun amiga pa mo sa imong barkada, ayaw na siya tagda. Ayaw’g timbaya maski respetar, wala niya girespeto inyong pagkahigala. Ang imong pakigbungol kaniya mas molanog pa sa imong mga pulong. Ayaw siya hisgoti sa inyong barkada. Kun sila mangutana’g ngano mo, ayaw hatag sa detalye, ingna siya ray nakahibawo, basta ikaw sa iyang mga mata deretso makatan-aw.

Mahimo nimo padalha’g mensahe imong uyab, puno sa imong kalagot ug kahiubos. Isulti ang tanan, boyboya kun kinahanglan. Pero kausa lang. Apan klaroha nga wala kay intensyon makig-uli, kay mapasalamaton ka nga samtang sayo pa imo siya nailhan.

Mahimo sab ka mangita’g higala nga maminaw sa tanan nimong gibati. O isuwat ang tanan sa papel, katulgi ug sunoga inig mata nimo. Balik-balika ang proseso hangtod nga wa na kay ikasuwat, buot pasabot imo nang nadawat.  —Tito Miguel

Magpatambag ka? Ipada kang Tito Miguel: 0998-581-5856