Ayaw’g dalia

Dear Tito Miguel,

Ako si Joseph, taga San Remigio, Cebu. Naa koy uyab, si Jessa, duna na kini anak---in short pinaangkan siya. Love kaayo nako si Jessa, apan naproblema ko kay dili jud siya madawat sa ako ginikanan kay lagi naa nay anak daan, unya maapil daw sa akong responsibilidad ang anak niini. Unsa ako buhaton Tito Miguel aron madawat siya sa akong pamilya? —Joseph

Joseph,

Ayaw sila pugsa, lalisa o dali-a nga madawat imong hinigugma. Ingna imong ginikanan nakasabot ka sa ilang kahadlok, nga magpas-an ka’g responsibilidad nga dili unta imoha. Pagpasalamat, kay ilang pagdumili timailhan nga pinangga ka nila. Apan kay nahigugma man ka, barug sa imong gipili. Total uyab pa man mo, dili pa kasado. Kun duna moy plano, pakasal kun andam ug sigurado na mo sa usa’g-usa. Apan ayaw kahibulong, lagmit sa kasal dili sila motambong.

Kun buot hunahunaon husto sila, ang anak sa imong uyab dili nimo responsibilidad, kun dili sa iyang mga ginikanan. Busa kun suportado sa amahan, mao nay ebidensiya ipakita nila nga imong abot way laing mokab-ot. Kun way suporta apan imong uyab dunay suweldo o negosyo, ingna sila basin ikaw pa ang nakatagamtam. Apan kun tinuod ilang gikahadlokan nga ikaw mahan-okan, kinahanglan mobarug imong uyab para sa katungod sa iyang anak. Mangayo siya’g suporta sa amahan. Kun dili madala’g hangyo, gamiti’g puwersa sa balaod. Konsulta’g abogado aron sigurado.

Angay ni buhaton sa imong uyab, dili aron ipakita sa imong ginikanan nga wala niya gitugyan kanimo ang responsibilidad, apan para sa iyang anak mismo ug kaugmaon niini. Samtang nitikang mo niining mga lakang, padayon sa inyong mga plano. Kasagaran nagdumili kadugayan mahilis kun makita ang sinseridad sa imong uyab ug imong kalipay kuyog niya. Pasagdi lang sila, ayaw sugata. Ini’g abot sa takna, imong problema masulbad ra’g iyaha. Labi na’g magdala na mo’g mga apo nga guapo’g guapa.    —Tito Miguel

Magpatambag ka? Ipada kang Tito Miguel: 0998-581-5856