Isumbong sa inyong boss
Dear Tito Miguel,
Ako si Rhie. Taga Ormoc City. Tabangi ko kay dili na gyud ko kahibawo unsaon ni nako akong kauban sa trabaho. Magsige man siya'g kasuko nako. Wala man koy sala niya. Ako ray iyang bantayan permi. Manungo pa gyud. Hasta iyang lola iyang tunguhon. Sobrahan ka butbuton. Dili baya siya guwapa, Tito Miguel! —Rhie
Rhie,
Nahisugamak ka’g toxic nga kauban sa trabaho. Ang kapait kay siya mismo wa kahibawo sa iyang tinuod nga pagkatawo. Gani, kun imo sitahon ikaw pay pakasad-on. Lisod na kun personal nimo badlungon. Kun sa trabaho apektado na inyong relasyon, sa inyong labaw angay na nimo isumbong.
Sa maong pamaagi, pormal imong reklamo. Kinahanglan andam ka mobatbat kun ipatawag na mo. Ayaw’g lipod-lipod, mao nay insaktong higayon ug plataporma nga basin siya mareporma. Isulti tanan nimong reklamo aron mahataga’g solusyon sa inyong amo.
Wa ka maghisgot asa ka nagtrabaho ug unsa kadako inyong kompanya. Kay kun duna moy nagkalain-lain nga departamento, mahimo ka mohangyo magpabalhin aron di na mo magkita. Kay sa adlaw-adlaw ninyong bagat, wa kay kalinaw mura ka’g gidagat.
Kun wala kay kabalhinan o kun duna dili ka sugtan ug siya walay kausaban, padayon la’g tutok sa trabaho. Iyang kasuko, panghimantay, butbot ug panungo walay kalambigitan sa inyong trabaho. Busa di na nimo angay patolan pa. Kay dili ba nanrabaho ka, ayaw’g paminaw ug tubay sa iyang mga personal nga gibuhat ug istorya. Ayaw’g usiki imong panahon sa tawo nga lisod na usbon.
Pero tinuod lisod kini buhaton kay maapektohan gyud ka sa iyang hait nga mga pulong. Apan kun di nimo paminawon ug tubagon, siya mismo kapoyon. Syaro’g dili siya maluya mangaway’g bongbong. Duol ug istorya lang kun sa trabaho kinahanglan. Sa inyong panagbungol duna gyud nay tensyon, apan ma’s maayo ang makabungog nga kahilom kaysa saba nga konsumisyon. —Tito Miguel
Magpatambag ka? Ipada kang Tito Miguel: 0998-581-5856
- Latest