Hunong Namo

Dear Tito Miguel ,

Ako diay si Jay, naay girl nga ganahan nako. Grabe na kaayo siya og nagasto nako kay gusto man siya nga ako siya sabayan sa iyang mga laag. Iya tanang gasto. Ang problema nako, inamiga ra gyud akong pagtagad niya pero grabe man siya og expectation uy, basin ingnon sad ko ani og paasa. Unsaon pagprangka nga dili siya malain? —Jay

Jay

Kun taas na siya’g expectation, maski unsaon nimo'g rason, malain gyud siya’g klarohan nimo sa imong tinuod nga gibati. Apan dunay pamaagi nga dili tantong sakit, apan posible kanimo moundang na siya’g sikit.

Ingna angay nga mohunong na mo, di ka makaako nga iyang paggasto imong pahimuslan ug abusohan. Sa maong entrada di pa siya masakitan kay buot pasabot iyang pagka manggihatagon dili nimo abusohan. Dili pa diay siya ang imong problema, kun dili ang iyang pamaagi sa pagdala ninyong duha.

Lagmit moingon walay problema, iyaha nang kuwarta. Wa ka magpahimulos, gani wa nimo siya gipugos. Ingna kun para niya wala’y isyu, para nimo ang pagtagamtam sa iyang kaayo usa ka matang sa abuso. Kay para nimo higala ra mong duha. Di ka gusto nga siya mahinayak sa way kapadulngan. Dinhi na siya malain, di gyud nimo lagi malikayan. Apan sa sinugdanan, di kaayo sakit kay mura’g mogawas nga iyang paggasto pa ang isyu, nga para niya positibo.

Tingali moingon ka’g mao ra gihapong istoryaha. Tinuod, apan ang kalahian kay makita niya nga dili ka mogamit niya. Wala nimo siya ilara, mao na’y dakong diperensiya. Apan angay ka mahimutang kay matinud-anon man ka, giklaro nimo niya ang pait nga kamatuoran, kaysa tam-is nga saad nga usa diay ka dako’ng pangilad. —Tito Miguel

Magpatambag ka? Ipada kang Tito Miguel: 0998-581-5856