Pagklarohay mo
Dear Tito Miguel,
Maayong adlaw kanimo! Sa tinuod lang, gikapoy na bitaw ko sa akong sitwasyon karon. Mura'g common na ang akong problema. Nakig-uban ko og girl nga dili nako love. Napugos ra gyud ko og uban niya tungod kay naa mi anak. Sa una man gud, nahubog ming duha maong nakabuhat mi og milagro. Ang nakapaet kay gi-pressure ko sa family sa girl nga mag-ipon gyud mi sa inahan sa bata. Unsa ako buhaton para makalingkawas ko? Andam raman ko mosustento sa bata. —Jason
Jason,
Istoryaha imong kapuyo, dili iyang ginikanan. Dili makatambal ang hinungdan sa inyong gidangatan. Ipadayag kaniya ang imong tinuod nga gibati. Kun namugna ang tanan sa hinubog, putla sa tarong aron way malubog.
Tingali imo gisuwayan, apan wala nimo nakat-onan paghigugma ang inahan sa imong anak. Insakto na imong paninguha. Ayaw pugsa imong kaugalingon. Lagmit imong problema unsao’g sulti niya.
Walay sayon nga pamaagi pakigbuwag, apan sa inyong sitwasyon dili tantong lisod kay sa sugod wala man mo’y relasyon. Kun maluoy ka unsay bation o mahadlok unsa iyang reaksyon, dili kaha pareha ra mo’g gibati? Kun ikaw nga estranghero napugos sa iyang ginikanan, unsa na lang kaha siya nga anak nila?
Pangutan-a, unsa iyang nakita sa kaugmaon ninyo tulo. Paminawa, apan maski unsa pa, isulti ang tinuod nimo nga gibati. Kun ang tuno sa imong boses seryoso, siya makabantay nga niabot na mo sa utlanan. Dili na siya tantong makuratan.
Ingna nga sa imong bahin, wala kay nakita nga kaugmaon para ninyong duha kay wala kay gibati para niya. Apan nakita nimo nga kamo nagpabilin nga managhigala, nagbahin sa kustodiya ug responsibilidad sa inyong anak. Kun moingon ikaw ra iyang giagad kay hasta siya kanimo way pag-agad, laya na ka, hasta siya.
Kun mohilak kay nahigugma na kanimo, ayaw padala. Sakit, apan ma’s masakitan siya kun magpabilin ka. Kun mangamuyo alang sa bata, ma’s luoy kun siya magdako sa mga ginikanan nga walay gugma ug respeto sa usa’g-usa. Ang sayop nga sugod, lisod tul-iron aron mohangtod. Tito Miguel
Magpatambag ka? Ipada kang Tito Miguel: 0998-581-5856
- Latest
