Sige'g pangasaba

Dear Tito Miguel,

Ako si Tina, taga Lapu-Lapu. Nagproblema ko sa akong igsuon nga lalaki kay sigehan lang gyud ko niya'g kasaba. Ako nay nagtrabaho, ako pay kasab-an. Bisa'g naay laing tawo, paka-uwawan gyud ta. Maglisud ko'g lakaw, hubakon ko, pero naningkamot gyud ko para lang unta wala siya'y ikasulti. Mosugmat akong hubak, wakoy ikapalit og tambal.Tabangi, tambagi ko. —Tina

Tina,

Wala nimo giklaro unsay rason sige ka niya kasab-an. Basin tungod kay sige ka kasayop o naa kay buhaton kaniya makapikon. Kun mao, angay nimo likayan o tul-iron aron kamo magmalinawon. Apan bisan pa, dili ka niya angay paka-uwawan. Wala sab nimo giklaro unsay kahimtang sa inyong balay. Duna ba siya’y pamilya nga kaninyo niipon o ikaw ang niipon nila? Lisod ba inyong kahimtang? Kay kun wala’y klaro nga rason ngano init siya’g ulo, basin dili na tungod nimo kun dili sa sitwasyon. Apan ang kapait kay ikaw ang mabuthan.

Busa istoryaha siya, ingna nga sakitan ka sa iyang pangasaba, labi na’g atubangan sa ubang tawo. Ingna nga tungod kay nirespeto ka niya, mangutana ka unsay angay nimo buhaton ug likayan aron dili na ka niya kasab-an. Kun unsay tubag, imo’ng sunod nga lakang diha manukad. Kun naa pa moy ginikanan ug maguwang, sumbong nila aron kamo mahusay. Lagmit hasta sila apektado sa inyong panagsungi. Nihisgot ka nga ikaw nay nagtrabaho, ikaw pay kasab-an. Lagmit sa balay, dili sa trabahoan. Kun ikaw nangempleyo’g dunay ikagasto, way rason imong kaugalingon isuksok pa nimo. Apan kun ikaw nagsalig niya mao nga yano ra siya mangasaba nimo, hangyoa nga dili palabian kay mosugmat imong hubak. Kun sa imong pagpaubos di siya mausab ug di na ka kaagwanta, maayo pa motrabaho o mangamo ka. Pangita’g maayong amo nga mobati sa imong kahimtang. Respetohon na ka, suweldado pa. Sa imong igsuon, hago na ka’g kasab-an, wa pay income. Tito Miguel

Magpatambag ka? Ipada kang Tito Miguel: 0998-581-5856