Abiso daan
Dear Tito Miguel,
Ako si Jo, 32 years old. Akong boyfriend ganahan na makig-meet sa akong mga ginikanan, pero akong balibaran kanunay kay mahadlok ko, ilabi na sa akong mama. Iya ko ingnon nga dili nami mga bata, duna na mi mga kabuot, pero dili gyud malikayan nga makulbaan ko. Unsay akong buhaton, Tito Miguel? —Jo
Jo,
Paminawa unsay rason nganong kulbaan ka’g maghimamat sila. Taas ba sila’g standard nga hadlok ka dili kapasar imong uyab? Dili man sila ang iyang minyoan kun pananglit, ikaw man. Kun dili sila makauyon, ikaw ray makahukom labi na’g sakto na ka sa panuigon.
Duna ba kay gipaila-ila sa una nga wala nila mauyoni busa nitagam ka? Usbon ko, dili sila ang giuyab kun dili ikaw. Hait ba manulti imong ginikanan labi na imong inahan nga basi’g sawayon imong uyab sa atubangan? Sukod kana unsa ka desidido imong uyab nimo, kay kun moatras siya tungod sa sakit nga pulong nila, iyang gugma kanimo kuwangan. Kun siya tiunay, iya kang barugan ug ipaglaban.
Pero kun nahadlok ka kay imong gikauwaw imong uyab, klarohi siya kay buot pasabot wala nimo siya gihigugma. Ang pinangga nimo angay ipasigarbo.
Ang angay nimo buhaton, abiso daan sa imong mga ginikanan nga makighimamat imong uyab nila. Lagmit malipay pa sila kay buot pasabot pormal ug seryoso siya. Paniid sa reaksyon, kun magdumili maski wala pa sila kaila, ayaw pugsa. Kun mosugot, wa na kay angay ikahadlok kay andam na sila. Sultihi sila daan kinsa ug unsa imong uyab, iyang trabaho, kagikan ug pamilya. Labaw sa tanan, nga imo siyang gihigugma. Kun nindot ila madunggan, sila mismo maghinam hinam. Wa ka kahibawo, sa imong pangedaron, dugay na sila nagpaabot naa kay ipaila-ila kanila. Hamtong na ka, lagmit imong ginikanan gusto na nga ikaw mahimutang. Tito Miguel
Magpatambag ka? Ipada kang Tito Miguel: 0998-581-5856
- Latest