Likay ug palayo

Dear Tito Miguel,

Ako diay si Ana 16 anyos.Naa koy silingan nga  50+ lalaki mag sige og hatag nako og kuwarta. Unya  naay ka usa nakit-an mi sa among silingan, gipanabi niya nga magsige ko og pangayo, bisan dili tinuod. Unya nagdamgo ko nga nawad-an og kuwarta ang tighatagan nako unya akoy gipasanginlan, mao nga pagka-ugma, mohatag na sab unta siya, wala na nako dawata. Nanluod man hinuon siya,maong naproblema ko. Dili ko ganahan manluod siya. Palihug tambagi ko. —Ana

Ana,

Maayo nga nangluod siya, ma’s maayo gani nga mopalayo siya kanimo. Menor de edad pa ka, delikado nga mopaduol ka’g hamtong nga lalaki nga sige’g tunol nimo. Nisulti ba siya ngano ug para unsa ang kuwarta?

Kun dili nimo siya paryente o ninong, kahibulongan nga sige siya’g hatag nimo’g kuwarta. Tingali nahimuot lang siya nimo o basin mura’g anak iyang tan-aw nimo. Maayo kun mao. Apan kun lahi iyang plano? Ang kuyaw kay kun iya kang gihaylo pinaagi sa kuwarta aron di ka makabalibad sa iyang gusto buhaton kanimo. Kahibawo ba imong mga ginikanan sa iyang binuhatan? Kaila ba sila? Lagmit ma-alarma sila labi na imong amahan.

Agi’g respeto nila, ayaw na’g dawat kun pananglit mobalik siya’g hatag. Likay ug palayo. Ampingi imong kaugalingon. Dili tinuod ang damgo, apan maayo nga kini maoy instrumento nga sa daotan ikaw mapanalipdan.    —Tito Miguel

Magpatambag ka? Ipada kang Tito Miguel: 0998-581-5856