45 ka balay naugdaw sa sunog sa Quiot

CEBU, Philippines — Niabot ngadto sa 50 ka balay ang napektohan sa nahitabong sunog kagahapon sa buntag diha sa Barangay Quiot, Dakbayan sa Sugbo.

Ang sunog giingong nagsugod diha sa ikaduhang andana sa panimalay ni Raynelia Ole.

Ang kayo sa sunog dali kining nikatap tungod kay kasagaran sa mga balay ginama sa light materials.

Gibana-banang niabot ngadto P1.9milyon ang danyos sa sunog hinuon walay gikataho nga naangol o namatay sa maong hitabo.

Base sa datos sa kambomberohan, 45 ka balay ang hingpit nga naugdaw ug lima ang partially burned.

Ang kabomberohan padayon pa nga nagpahigayon sa imbestigasyon pagsuta sa hinungdan sa sunog.

Sa laing bahin, paspasan sa kabomberohan sa Dakbayan sa Talisay ang pag-umol og fire brigade nga mao dayon ang mo responde sa sunog ug sa bisan unsa nga klase sa emerhensiya.

Matud ni Senior Inspector Alvin Torion, fire marshal sa siyudad nga ang fire brigade dako og tabang alang sa komunidad tungod kay sila ang unang masayod sa panghitabo sa ilang lugar.

Sa pagbisita ni Torion diha sa buhatan ni Mayor Gerald Anthony “Samsam” Gullas Jr. gituki niya kini.

Sulod sa 22 ka barangay sa Talisay, tulo ka barangay ang nakaumol na og fire brigade.

Usa niini ang Barangay Bulacao pinangulohan ni Kapitan Banjo Abastillas.

Ang Barangay Tabunok aduna na usab kini fire brigade kinsa mao ang kanunay’ng makatabang sa lokal nga kabomberohan.

Nihangyo usab si Torion kang Gullas og dugang pa nga fire sub-station. —Gabriel C. Bonjoc/BDB (BANATNEWS)