Rama nibahad nga ipakanselar ang kontrata sa contractor sa CCMC

CEBU, Philippines — Ipakanselar ni Cebu City Mayor Michael Rama ang kontrata sa contractor sa bag-ong Cebu City Medical Center (CCMC) kon mapakyas kini sa paghuman sa building sa gikatakda niya nga panahon.

Si Rama nipadayag sa iyang kasagmuyo sa pagkalangay sa trabaho sa contractor sa paghuman sa 10 ka andana  nga building.

Niadtong buwan sa Abril, ang kagamhanan sa siyudad niluwat og Notice to Proceed alang sa ikaupat nga hugna sa bag-ong CCMC building diin P916.8 milyones ang gigahin nga pundo alang niini.

Gihagit ni Rama ang M. E. Sicat Construction nga taposon ang construction sa iyang adlaw nga natawhan sa Oktubre 28 ug nisanong niini ang contractor.

Gipatawag ni Rama ang mga kadagkoan sa pipila ka departamento sa city hall apil ang bag-ong gitudlo nga hepe sa CCMC nga si Dr. Mary Jean Loreche aron hisgotan ang kalamboan sa katukoran sa maong tambalanan.

Gipasalig ni Engineer Lowell Corminal sa Department of Engineering and Public Works (DEPW)  nga makab-ot gihapon ang target.

Si Rama nihimo og handwritten agreement nga gipirmahan sa tanang nitambong sa tigom. Base sa sinulat nga kasabotan, ang mga nipirma nisaad nga mahuman ang bag-ong CCMC karong Oktubre 28, 2022.

Lakip sa mga taposon mao ang pagkompleto sa estruktura hangtud sa ika-10 nga andana; mga bongbong ug mga bintana sa ika-8 nga andana; saktong kisame ug bentilasyon; linya sa tubo sa tubig ug kanal alang sa laboratoryo; dugang lawak sa intensive care unit (ICU) ug lawak diin nahimutang ang CT scan; ug dugang nga mga lawak.

Nasabotan usab nga mobisita si Rama sa bag-ong CCMC matag semana aron makakuha og update sa contractor kalabot sa kalamboan sa nagpadayong construction. —BDB (BANATNEWS)