Mga nagpuyo sa lugar nga nidahili ang yuta pabakwiton

CEBU, Philippines — Nakasinati og padahili sa yuta diha sa Block 11, Sitio Lareha, Barangay Kalunasan , Dakbayan sa Sugbo human ang riprap wall diha sa lugar nahugno gumikan sa mga pagbunok sa uwan.

Nunot niini, si Konsehal Jerry Guardo, chairman sa Committee on Infrastructure nipahigayon og inspection sa dapit ug nakita niini ang kadelikado sa sitwasyon diin adunay mga kahoy nga natumba nga niali diha sa sapa nga kabahin sa Guadalaupe River.

Matud ni Guardo nga ang dagayday sa tubig sa drainage system diha sa lugar ang usa sa mga hinungdan nga nidahili ang yuta tungod kay nihumok ang pundasyon sa riprap wall ug natumba usab ang kahoy nga mao unta ang nagpugong sa yuta.

Ug aron malikayan nga mosaka ang tubig sa sapa sa lugar gikuha ang mga dagkong kahoy nga nakakabag diha sa sapa pinaagi usab sa tabang sa Cebu City Disaster Risk Reduction Management Office (CCDRRMO).

Nagkanayon si Guardo nga gikinahanglan ang barangay intervention aron ma-relocate ang nagpuyo sa balay nga delikado matagak diha sa sapa kon aduna pay pagdahili sa yuta nga mahitabo.

“I would recommend katong mga residente, katong mga balay there must be force evacuation kay dili gyud kaayo safe na ang ilang pagpuyo makita ninyo, nagtakakilid na ang balay, ang pundasyon wala nay strong foundation, there must be an immediate force evacuation”, dugang ni Guardo. —BDB (BANATNEWS)