Programa sa pagsulbad sa problema sa baha hingusgan

CEBU, Philippines — Si Mayor Michael Rama nagkanayon nga hingusgan ang mga programa alang sa pagtapos sa problema sa baha sa Siyudad sa Sugbo.

Matud ni Rama nga magtinabangay sila Atty. Gerry Carillo, chairman sa Cebu City Disaster Risk and Management Council ug Konsehal Jerry Guardo alang sa pagdumala niini.

Nasayran nga tungod sa sagunson nga pag-ulan nakasinati og pagbaha ang nagkadaiyang dapit sa siyudad.

Magpadayon usab ang iyang mga programa sama sa dredging, de-clogging ug pagpanglimpiyo sa mga kanal.

Sayo pa, naumol ang River Trooper Group alang sa pagpanglimpiyo sa mga sapa sa siyudad.

Adunay mga regular clean-up drive nga gihimo sa siyudad diin nakig-alayon kini sa nagkadaiyang organisasyon ug mga kompaniya.

Matud ni Guardo nga gimando ni Rama nga hatagan og focus ug prioritization sa budget allocation gikan sa national government apil usab ang paggamit sa pundo sa siyudad aron magamit sa flood control project.

Nagpadayon karon ang pagpalambo sa kasapaan apil na niini ang Lahug River, T. Padilla, Tejero, Tinago, Kinalumsan, Butuanon ug Bulacao.

Gibutyag ni Guardo nga gitrabaho na nila ang resulta sa parcellary survey ingon man ang assessment ug kon ma-submit na sa Department of Public Works and Highways sugdan dayon ang pagpatuman sa flood control projects.

Samtang sa Dakbayan sa Talisay, si Kapitan Banjo Abastillas nibutyag nga duha ka hugna sa pagbaha ang nasinati sa Barangay Bulacao niadtong Martes sa hapon.

Ang tubig sa baha niabot kutob sa hawak sa tawo ang giladmon.

Daghang sakyanan ug motorsiklo ang nisungasong hinungdan nga nasinati ang grabeng kahuot sa trapiko. —Sanden J. Anadia ug Gabriel C. Bonjoc/BDB (BANATNEWS)