Rama: agdon ang hukom sa presidente bahin sa brgy elections

CEBU, Philippines — Labing maayo nga huwaton ug agdon ra ang mahimong hukom ni Presidente Bongbong Marcos kalabot sa sugyot sa ubang magbabalaod nga iuswag sa laing tuig ang 2022 barangay elections.

Kini maoy komento nila ni Mayor Michael Rama ug Liga Ng Mga Barangay Cebu City Chapter President Franklyn Ong kalabot sa nitumaw nga sugyot.

Kahinumdoman si Cebu City North District Representative Rachel Marguerite "Cutie" del Mar maoy niduso sa maong balaudnon uban sa tumong nga makadaginot ang panudlanan sa gobyerno.

Apan si Rama nitataw nga ang tingog sa presidente maoy angayan nga paaboton ug posibleng mahisgotan kini sa State of the Nation Address (SONA).

Samtang si Ong usab miingon nga nakaponting ra gyud sila sa ilang mga trabaho ug andam sila modawat kun duna man gani mahitabong kausaban sa petsa sa piniliay.

"Kami, huwat lang mi unsay mando sa taas. Kung ilang ipostpone andam ra mi, mopadayon gihapon mi sa among serbisyo," suma pa ni Ong.

Gitug-an ni Ong nga nagkalain-lain ang reaksyon sa ubang mga kapitan kalabot sa maong butang apan ang tanan mosubay ra gyud sa makab-ot nga desisyon sa presidente.

Sa social media, nagkalain -lain ang reaksyon sa netizens, ang uban dili uyon nga iuswag ang eleksyon sa barangay gumikan kay mas motaas ang ilang pag-antos sa mga opisyal nga wala gyud naglihok.

Duna pu'y uban niingon nga ang mga magbabalaod nga mahadlok makagasto maoy gustong iuswag ang piniliay.

Sa laing bahin hingpit na nga miasumer isip acting barangay captain sa barangay Zapatera sa Siyudad sa Sugbo ang numero unong konsehal sa maong barangay nga si Konsehal Juan Flores Jr.

Si Mayor Michael Rama maoy mihimo sa pagpanumpa nga gipahigayon niadtong Hulyo 4. 2022. Si Konsehal Flores maoy hulip ni Zapatera barangay captain Francisco Benedicto nga gisuspenso og 90 ka adlaw. —Romeo T. Limpangog/ MEL (BANATNEWS)