Gastos sa COVID-19 response ikarga sa CCHD

CEBU, Philippines — Gitugotan sa Cebu City Council ang City Health Department (CHD) nga i-charge ang COVID-19 expenditures sa ilang buhatan nga mokabat sa P40 milyones ubos sa Quick Response Fund sa Local Disaster Reduction and Management Fund 2022.

Nasayran nga  gikonsiderar kini nga  panginahanglan sa padayon nga pagpatuman sa mga lakang aron matubag ang emerhensya sa public health ingon man usab ang  kaayohan sa mga residente sa dakbayan.

Si Konsehal Jocelyn Pesquera maoy niumol  og resolusyon kalabot sa maong butang nga giaprobahan atol sa miaging regular session.

Si Pesquera nagkanayon nga ang P5 milyones niini alang sa COVID-19 activities, samtang ang P35 milyones alang sa normal nga operasyon sa CHD nga naglakip sa nagkalain-laing health centers.

Nagkanayon ang CHD nga ang P5 milyones nga budget gamiton samtang ang departamento nangandam sa padayon nga pagdumala sa dungan nga pag-abli sa mga vaccination sites nga nagkinahanglan og bug-at nga galastohan aron mapadayon ang kapasidad ug operasyon niini.

Samtang tipik  sa P35 milyones kay gamiton usab sa  pagpalit niini og anti-rabies vaccines. Giaprubahan usab sa Cebu City Disaster Risk Reduction and Management Council (CDRRMC) ang Resolution No. 021, Series of 2022 nga nagrekomendar sa Sangguniang Panlungsod nga mopalabang og resolusyon kalabot sa hangyo sa CHD.

Sumala sa resolusyon, ang CHD gimandoan sa pagpauswag sa kahimsog, mangita og mga pamaagi sa  pagpugong sa pagkaylap sa mga sakit nga makatakod pinaagi sa paghatag sa labing taas nga sukaranan sa kalidad nga serbisyo.— IBM (BANATNEWS)