Lagon moduso og balaudnon paghimong siyudad sa Consolacion

CEBU, Philippines — Gitinguha ni 6th District Representative Daphne Lagon ang pagduso sa balaudnon nga paghimong siyudad sa Lungsod sa Consolacion.

Suma pa sa kongresista nga sa pagsugod sa regular session karong Lunes Hulyo 4, iyang hatagan og unang pagtagad ang pagduso sa maong balaudnon.

Kini gumikan kay taud taud na ang maong plano ug panahon na aron kini mapatuman ilabi na kay dunay kausaban ang Local Government Code of 1991 ubos sa Republic Act 11683  nga nag- ingon nga wala na magkinahanglan og gidaghanon sa populasyon alang sa paghimong siyudad sa usa ka dapit.

Usa sa rekisitos mao ang income sa lungsod nga moabot og dili mominus sa P100M sa milabay nga duha ka tuig.

Gitug-an ni Lagon nga ang Consolacion aduna nay income matag tuig nga mokapin sa P100M sud na sa pipila ka tuig ug kalipikado na kaayo kini nga mahimong siyudad.

Samtang gipadayag usab ni kongresista Lagon nga laing balaudnon nga iyang iduso mao ang paghimo sa Ibabao National High School sa Lungsod sa Cordova.

Gipasabot niya nga iyang nakita ang panginahanglan sa National High School sa maong dapit aron maghatag og kasayon sa mga tinun-an nga dili na mobyahe og layo aron lang makatungha.

Naglakip sa mga barangay nga makatungha sa National High School sa Ibabao, Cordova mao ang sikbit nga barangay sama sa  Cogon, Pilipog, Dapitan nga kasamtangan karon nga nagtungha sa Babag National High School sa Barangay Babag sa Siyudad sa Lapu-Lapu. MEL (BANATNEWS)