Kapin sa 1,000 ka drayber nakadawat og ayuda

CEBU, Philippines — Kapin sa 1,000 ka drayber  sa mga pampublikong sakyanan ang nakadawat sa  P5,000 nga Economic Stimulus Package gikan sa kagamhanan sa Siyudad sa Sugbo.

Matud sa chaiman sa Cebu City Disaster Risk Reduction and Management Council (CCDRRMC) Atty. Gerry Carillo nga una pa lang kini nga hugna ug aduna pa’y laing batch sa mga drayber ang padayon nga gi-validate aron makadawat sa maong ayuda.

Nagkanayon si Carillo nga usa ang transportation sector sa mga apektado kaayo atol sa pagtumaw sa pandemiya ug gisundan pa kini sa grabeng pagsaka sa presyo sa gasolina.

Alang kaniya, dako na kaayo og tabang ang maong stimulus package alang sa mga drayber ug padayon ang pagpanday sa kagamhanan ug uban pa nga mga programa aron makatabang sa maong sektor.

Sa nilabay’ng mga bulan gilusad sa kagamhanan sa siyudad ang discount card alang sa mga gasolinahan.

Samtang gipahibalo usab ni Carillo nga aduna na sila’y gipanghangyo karon nga dugang oil companies aron mobaligya og barato nga gasolina ngadto sa mga motorista.

“Ang buhaton sa city government, kay motabang mi nila (oil companies) og facilitate  nga makakita og  igong pundo sa gasolina nga dapat barato ra pod nila nga ibaligya ngadto sa katawhan’, matud ni Carillo.

Nasayran nga nitiyabaw na ang mga motorista sa kataas na sa presyo sa gasolina.

Gani gipatuman na sa niaging adlaw ang P2.00 nga usbaw sa pletehan sa mga PUJ.

Apan ang mga PUJ makasingil lang kini og dugang P2.00 sa plete kon adunay bag-ong taripa nga nakapaskin sa unit niini. BDB (BANATNEWS)