Yaya ‘dakpan sa drug bust
CEBU, Philippines — Mangihaway og baboy ug usa ka yaya og bata ang gidakop sa managlahing operasyon sa kapolisan labot sa ilegal nga drugas sa Dakbayan sa Talisay niadtong Domingo sa kaadlawon.
Unang operasyon nahimo sa Sitio Mananga 1, Barangay Tabunok mga alas 2:44 sa kaadlawon.
Sila Police Lt. Elwood Ebona sa Drug Enforcement Unit (DEU) nikwelyo ni Junifer Campo Quiñones alyas Pare-Pare, 40, nga usa ka mangihaway og baboy.
Lakip sa gidakop ang iyang kaubang si Eduardo Cagang Bustillo Jr., 32, taga Barangay Cansojong.
Nakuhaan sila og shabu nga nitimbang og 3.35 gramos nga adunay gibana-banang balor nga P22,780 ug .22 nga revolver nga adunay upat ka buhing bala.
Samtang nasikop sab si Mary Ann Villaver Cabuenas, 34, usa ka baby sitter nga taga Sitio Cassare, Barangay Cansojong niadtong alas 5:10 sa kaadlawon.
Matud pa ni Ebona nga diha nila nasikop si Cabuenas diha daplin sa South Road Properties (SRP) sa Barangay Cansojong diin nakuhaan og drugas nga 25 gramos nga gibana-bana nga balor nga P170 mil.
Nagkanayon si Ebona nga ang dinakpan makabaligya og drugas nga motimbang og 50 gramos sa matag semana.
Gani nasikop na kini kaniadto apan nakagawas pinaagi sa probation. Ang mga dinakpan gikatakdang pasakaan og kaso.— IBM (BANATNEWS)
- Latest
