Rama mimando nga hapsayon ang Carbon Market
CEBU, Philippines — Duha ka semana ang gihatag nga tagal ni Cebu City Mayor Michael Rama sa bag-ong natudlo nga Market Administrator Wayne Cenas Jagmoc aron han-ayon ang Carbon Public Market gikan sa kasamtangang kahuot sa kadalanan ug aron limpyohan ang lugar.
Matod pa ni Rama nga dunay duha ka semana si Jagmoc aron hapsayon ang lugar ug mahimong two-way ang mga dalan alang sa mga motorista.
Bahad sa Mayor nga kun magmagahi ang mga opisyal sa barangay siya mismo ang mangunay sa paghawan ug pagguba sa mga nakaali sa dalan.
“Walay paryente, walay amigo, walay sacred cow. Kita ba ka naa koy gipasulod nga kaliwat? Wala”, matod ni Mayor Rama atol sa tigom sa iyang buhatan sa mga opisyal sa Cebu Market Vendors Multipurpose Cooperative (Cemvedco).
Daling gisanong ni Jagmoc ang sugo sa mayor ug nipasalig nga kaya niya kining ipatuman.
“Kaya kaayo. Ato nang hawanan ang Carbon Market nga mahimong two-way para mahapsay”, ni Jagmoc pa.
Apan alang kang Erwin Gok-ong, chairman sa Cemvedco, lisod ang gipabuhat sa mayor, suma niya, kinahanglan pa siyang makigtagbo ni Atty. Collin Rosell, executive secretary sa mayor, alang sa dugang plano kon unsay buhaton.
Sa laing bahin, gipadayag ni Mayor Rama ang iyang tinguha nga mapadayon ang night market sa Carbon Public Market aron mahatagan og kahigayonan ang tanan nga makapanginabuhi diha sa lugar.
Nipahimangno siya nga kinahanglang walay kawani sa City Hall nga manag-iya og stall atol unya sa night market ug siya mismo ang mosusi kung taga-Cebu City ba gayud ang mahatagan og dakong kahigayonan nga makanegosyo diha sa Carbon.
Lain niyang ipasiguro mao nga kadtong namaligya sa buntag hangtud lang sa alas singko sa hapon samtang ang mamaligya sugod sa alas sayes sa gabii kutob ra sa kadlawon. Kinahanglan sab nga inigka-buntag limpyo na ang lugar para sa laing mopuli nga manindahay. MEL (BANATNEWS)
- Latest
