BBM ika-17 pangulo sa nasud

CEBU, Philippines — Pormal na nga milingkod kagahapon sa udto isip ika-17 nga Presidente  sa  Republika sa  Pilipinas nga si Ferdinand “Bongbong” Marcos Jr. diha sa hawanan sa  National Museum sa kaulohan.

Nanumpa ang bag -ong presidente atubangan ni  Supreme Court Chief Justice Alexander Gesmundo.

Kabahin sa iyang speech mao ang iyang pagpasalamat sa gisundan niya nga presidente nga si Rodrigo Duterte gumikan kay nakita gyud niya niini ang maayong panerbisyo sa katawhan.

Nagpasalamat usab siya sa katawhan sa makabungog mga suporta kaniya sa nakalabay nga piniliay ingon man usab sa pagtugot kaniya nga maangkon ang panaghiusa.

"By your votes, you rejected the politics of division. I offended none of my rivals in this campaign. I listened instead to what they were saying. Pinakinggan ko ang tinig ninyo na ang sinisigaw ay 'pagkakaisa, pagkakaisa, pagkakaisa'," nagkanayon ang presidente.

Buot usab sa bag-ong presidente nga matutukan ang pagdumala sa kaugmaon sa nasud busa wala na siya maghisgot sa mga panghitabo kaniadto.

Ang aktres ug loyal supporter ni Marcos nga si Toni Gonzaga maoy nikanta sa Nasudnong Awit.

Naa usab sa inugurasyon mao mga sakop sa pamilyang Marcos ilabi na si kanhi First Lady  Imelda Marcos nga inahan ni Bongbong,  ug ang bag-ong First Lady nga si Liza Araneta-Marcos, ilang mga anak nga si Kongresista  Sandro Marcos, ug iyang mga igsuon nga sila si Senador Imee Marcos ug Irene Araneta.

Nitambong sab sa kalihokan ang bag-ong bise presidente nga si Sara Duterte.

Naa usab ang presensya sa mga kanhi Presidente nga sila si  Joseph "Erap" Estrada ug Gloria Macapagal-Arroyo.

Nitambong pud ang pipila ka  foreign dignitaries, diplomatic corps ug ubang mga espesyal nga bisita.

Sa wala pa ang inugurasyon , nag-istoryahanay daan sila si  Marcos ug Duterte sa  Malacañang Palace kun diin gihimo usab ang departure honors.

Gihimo pud ang  interfaith prayer ug civil-military parade.

Pagkahuman sa inugurasyon , nibalik si Marcos sa Malacañang Palace ug gihimo ang  mass oath-taking sa iyang mga gabinete, nga gisundan sa inaugural dinner.

Kahinumdoman nga sa niaging piniliay niadtong Mayo 9, 2022, nakaangkon si Marcos og kapin 31 milyones nga botos.

Ang kadaugan ni Marcos maoy nagpabalik sa ilang pamilya diha sa Palasyo nga kaniadto gihuptan sa iyang amahan nga kanhi diktador Ferdinand Marcos Sr. sud sa dul-an 20 ka tuig hangtud nga sila gipalagpot niadtong 1986 pinaagi sa People Power Revolution. —IBM (BANATNEWS)