Mga bag-ong nanumpa nga opisyal gipahinumduman ni Palma

CEBU, Philippines — Si Archbishop Jose Palma sa Archdiocese of Cebu nipahinumdum sa mga bag-ong nanumpa nga opisyal nga maampoon, maayong public servants ug maghuna-huna sa ilang mga konstitutwente ilabi na sa mga pangandoy ug paglaom niini.

Si Palma maoy nangulo sa Santos nga Misa sa wala pa ang oath taking sa mga opisyal sa kagamhanan sa Dakbayan sa Sugbo.

Matud ni Palma nga ang pagkapili isip usa ka opsiyal sa gobiyerno aduna usab kini kuyog nga responsibilidad sa iyang katawhan ilabi na sa ilang pagserbisyo.

Ug ang pagka-politiko dili kini sama sa basketball nga human sa kadaogan natapos na apan sa politika human sa kadaogan anha na ang tinuoray nga serbisyo ngadto sa iyang katawhan.

Gipadayag ni Palma nga ang katawhan nitingog na pinaagi sa botos nga gihatag hinungdan nga angayang respetohon ang sentimento sa katawhan.

Si Palma nagkanayon ngadto sa mga napili nga opisyal nga dakong dungog ug pribilihiyo ang ilang pagkapili apan aduna kini dakong responsibilidad.

Subay niini, malinawon ang gipahigayon nga oath taking ni Mayor Michael Rama sa Dakbayan sa Sugbo uban sa mga kauban niining napili nga mga opisyal.

Ang maong kalihokan gipahigayon diha sa Plaza Sugbo nga gitambongan sa liboan ka dumadapig ug dinapit nga mga bisita.

Kini ang gibutyag sa tigpamaba sa Cebu City Police Office Police Lieutenant Colonel Maria Theresa Macatangay.

Matud ni Macatangay nga gikan sa pagpakatap sa mga polis alas 6:00 sa buntag hangtud nahuman ang maong kalihokan wala sila’y natala nga mga negatibong insidente ug wala usab sila’y natala nga krimen diha sa lugar diin gipahigayon ang oath taking ug wala sila’y na-monitor nga nagprotesta.

Nasayran nga sobra sa 130 ka mga polis, force multipliers ug volunteer ang gipakatap kagahapon. —BDB (BANATNEWS)