Rama niluwat og EO pag-umol sa Oplan Denguerra
CEBU, Philippines — Pormal na nga giisyu kagahapon ni Mayor Michael Rama ang Executive Order 173 nga nag-ulohan og “Oplan Denguerra”.
Tumong niini ang panaghiusa sa tanang sektor sa pakigbatok sa dengue.
Gimandoan ang mga komunidad, establisamento, institusyon ug tanang entities sa Siyudad sa Sugbo nga mohimo og aksiyon alang sa pagpuhag sa "mosquito-breeding sites".
Gitambagan usab sa mayor ang katawhan nga moumol og "self-protection" measures sama sa pagsul-ob og long pants ug long-sleeved shirts, ug ang regular nga paggamit og mosquito repellent ug kong adunay gipamati sa lawas magpakonsulta dayon. Gimandoan usab ni Rama ang opisyales sa barangay ug tinugyanan sa nagkadaiyang departamento sa City Hall nga moumol og konkretong aksiyon aron maputol o malikayan sa mga tawo ang dengue.
Ang health centers, medical facilities ug hospitals kinahanglan nga naka- ekipo usab kanunay alang sa pag-atiman sa mga pasyente nga nataptan og dengue.
Nahisgotan usab sa Section 4 ang pag-umol og Enhanced Citywide Qualitative Health and Sanitation Drive.
Kinahanglan nga mohatag og kooperasyon ang mga empleyado sa gobiyerno nga nadestino sa siyudad, barangay workers, convergence group, Task Force Puyo , education sector/academe, business sector, religious denominations, coastline management board, homeowners and community associations, ug uban pa nga mga grupo.
Nalatid usab sa Section 8 ang "Bottoms Up Approach " diin magtinbangay ang tanan alang sa maong kampaniya.
Mohimo usab ang siyudad og lapad nga information drive alang sa maong concern. Gidasig usab niini ang Kapisanan ng mga Broadcaster ng Pilipinas (KBP) nga motabang sa kampaniya sa pakigbatok sa dengue. —BDB (BANATNEWS)
- Latest