Cebu City nitugot na sa face-to-face classes sa tanang level

CEBU, Philippines — Gitugot na sa Cebu City Government ang pagpahigayon sa face-to-face classes sa tanang level kini human gipirmahan ni Cebu City Mayor Michael Rama ang Executive Order No. 174 kun “Balik Eskwela, Pabakuna Bonanza, Ekonomiya Isaka”. Matud ni Atty. Collin Rosell, legal consultant ni Rama nga sa pagtugot sa kagamhanan sa siyudad sa face-to-face classes kinahanglan usab nga tumanon ang minimum public health standard tungod kay anaa pa ang pandemiya.

“Klaro ha, ang face-to-face classes sumala na sa gihangyo sa daghan kaayo nga unibersidad ilabi na ang mga private sector nga educational institution nibisita sa mayor kini agig tubag, agig pagsuporta para sa maayong edukasyon ngadto sa atong mga estudyante”, matud ni Rosell.

Giklaro ni Rosell nga gikinahanglan ang intensified ug continuous vaccination program tungod kay ang bakuna makatabang aron makalingkawas sa pandemiya.

“Ato man ning gitugtan, risgo man ni sa ato pa kinahanglan gihapon ta nga mag-amping mao na bakuna, ang mga school clinic kinahanglang mangandam, early detection, early consultation, self-regulation and shared responsibility padayon pero labaw sa tanan bisan sa ingon ini nga higayon gitugotan ang pag-conduct sa sa face-to-face classes”, ni Rossel pa.

Nalakip sa EO No. 174 nga ang mga tunghaan moumol og guidelines ug makig-alayon sa Cebu City Health Department aron makahimo og guidelines unsaon pagtubag ug pag-atiman sa mga makitaan og sintomas sa COVID-19.

Karon nga napirmahan na ang EO No. 174 si Rosell nagkanayon nga epektibo kini karon dayon. —BDB (BANATNEWS)