Konsulta Package sa BHC ipa-accredit sa PhilHealth
CEBU, Philippines — Naa na karon sa proseso ang pag-accredit sa 85 ka mga Barangay Health Center (BHC) sa dakbayan sa Sugbo. ngadto sa programang “konsulta package” sa Philippine Heath Insurance Corp. (Philhealth). Kini nagpasabot nga dunay libreng laboratory ug uban pa nga klase sa konsultasyon ang itanyag sa mga BHC.
“Pinabilis namin mayor para madali na sa kanila ang magpa-primary care, laboratories, gamit, at iba pa,” mensahe pa ni Marjorie Cabrieto, Philhealth regional vice president, atol sa iyang courtesy call kang Mayor Michael Rama dili pa lang dugay. Gisultihan ni Rama si Cabrieto nga himoong regular ang pagsusi sa tanang mga datos niini aron mahimong tulin ang sistema.
Gihangop ni Dr. Jeffrey Ibones, pangulo sa City Health Department Head ang maong kalamboan. Nangita na karon ang kagamhanan og mga doktor nga espesyalista aron idugang sa mga BHC.
Nasayran nga duna'y mga higayon nga kun magkulang ang doktor , makakuha sila og mga pribadong doktor nga mo-duty sa BHC busa dili tanang serbisyo ang libre kaniadto. Busa dako kaayo og matabang ang "konsulta package " sa PhilHealth. Sa ubang barangay , dako kaayo og populasyon ang serbisyohan sa usa ka doktor.
Sa report sa Cebu City Public Information Office , ang serbisyo ug benipisyo nga libre ubos sa Philhealth kay naglangkob sa primary care services, ingon man usab ang laboratories diagnostic examination nga sama sa complete blood count nga may platelet count, urinalysis, fecal analysis, sputum microscopy, fecal occult blood test, pap smear, lipid profile (total cholesterol, HDL ug LDL cholesterol, triglycerides), FBS, oral glucose tolerance test, ECG, chest X-ray, Creatinine, ug HbA1c.
Libre usab ang mga tambal ug medisina pangontra sa kagaw (anti-microbial) nga sama sa amoxicillin, co-Amoxiclab, nitrofurantoin, cotrimaxasole, ciprofloxacin, clarithomycin.
Nalakip usab ang listahan nga tambala sa hubak nga sama sa prednisone, salbutamol, ug fluticasone+salmetrol.
Naa usab ang mga tambal sa ubang sakit nga sama sa paracetamol, simvastatin, gliclazide, metformin, enalapril, metopolol, amlodepine, hydrochlorothiazide, losartan,aspirin ug chlorophenamine maleate. —IBM (BANATNEWS)
- Latest
