Mga polis ipakatap atol sa inugurasyon ni BBM
CEBU, Philippines — Gitakdang 30 ka polis ang ipakatap alang sa inugurasyon ni President elect Ferdinand Marcos Jr.ug sa kalihokan ni Mayor Michael Rama karong Hunyo 30, 2022. Matud ni Police Lieutenant Colonel Wilbert Parilla, deputy director for administration sa Cebu City Police Office nga duha ka platoon sa kapolisan gikan sa Civil Disturbance Management (CDM) ang gitahasan nga mag-monitor sa mga kalihokan nga motumaw lakip na niini ang mga rally.
Si Parilla nagkanayon nga mopatuman sila ug “No Permit, No Rally” policy apan hatagan nila og higayon ug tukma nga oras aron makapadayag sa ilang sentimento ang mga magprotesta ug ipatuman nila ang maximum tolerance sa lugar diin kini mag-rally.
Gibutyag ni Parilla nga sayo pa lang sa Hunyo 30, 2022 ilaha nang i-secure ang Plaza Sugbo diin gipaabot nga 20, 000 ka tawo ang motambong sa kalihokan ni Rama.
Ug ni-request sila og usa ka platoon sa Police Regional Office-7 gikan sa CDM aron motabang sa pagpatuman sa kahapsay ug kalinaw atol sa maong adlaw.
Si Jaime Paglinawan sa Bayan Muna nibutyag nga mga sakop sa progressive groups mohimo og rallies atol sa inagurasyon ni BBM apan wala pa sila’y tukma nga plano kabahin sa lugar diin sila magpahigayon sa ilang kalihokan. BDB (BANATNEWS)
- Latest